Technology Khabar २२ बैशाख २०८०, शुक्रबार
काठमाडौं ।
विश्वका तीन प्रमुख प्रविधि कम्पनीहरू गुगल, एप्पल र माइक्रोसफटले गत वर्ष फिडो (FIDO) गठबन्धन बनाएका थिए। टेक कम्पनीहरूले पासवर्डको सट्टा पासकी प्रयोग गर्न जोड दिन खोजिरहेका छन्।
गुगलले आफ्ना प्रयोगकर्ताका लागि पासवर्डरहित सुविधा ल्याएको छ। गुगल प्रयोगकर्ताहरूले अब पासवर्ड बिना नै आफ्नो जिमेल, युट्युब, एन्ड्रोइड खाताहरूमा लग इन गर्न सक्षम हुनेछन्। यसका लागि प्रयोगकर्ताहरूले खातामा लगइन गरेपछि पासकी नामक डिजिटल प्रमाणहरू सिर्जना गर्नुपर्नेछ।
गुगलले आफ्नो ब्लग पोस्टमा मे ३ बाट गुगलका सबै खातामा पासकी सुविधा थपिएको बताएको छ। गुगलले प्रयोगकर्ताहरूले यसलाई प्रयोग गर्न पासकी बनाउनु पर्ने बताएको छ। पासकी सिर्जना भएपछि, प्रयोगकर्ताहरूलाई गुगल खातामा लग इन गर्दा पासवर्ड र टू फ्याक्टर अथेन्टिकेसन सोधिने छैन। यस अवस्थामा, प्रयोगकर्ताहरूले आफ्नो खातामा लग इन गर्न पासकी मात्र प्रयोग गर्नुपर्नेछ।
गुगलले आफ्नो ब्लग-पोस्टमा यो एप्स र वेबसाइटहरूमा लग इन गर्ने नयाँ तरिका भएको बताएको छ। यो पासवर्ड भन्दा सजिलो र सुरक्षित छ। पासकी (Passkey) बनाएपछि, प्रयोगकर्ताहरूले आफ्नो खातामा लग इन गर्न घरपालुवा जनावरको नाम, जन्म मिति र पासवर्ड १२३ जस्ता सामान्य पासवर्डहरू राख्न आवश्यक पर्दैन। प्रयोगकर्ताहरूले आफ्नो डिभाइसको फिंगरप्रिन्ट, स्क्रिन लक, पीन वा फेस स्क्यानमार्फत आफ्नो गुगल खातामा लग-इन गर्न सक्षम हुनेछन्।
गुगलले पासकी प्रयोग गर्ने प्रयोगकर्ताहरूले अनलाइन साइबर आक्रमण, ठगी आदिबाट बच्न सक्ने दाबी गरेको छ। यसले प्रयोगकर्ताको गुगल खाताहरू एसएमएस वन टाइम पासवर्ड (ओटीपी) जस्ता सुरक्षित बनाउँछ।
प्रकाशित: २२ बैशाख २०८०, शुक्रबार
