भारतसँग जोडिएको सीमाक्षेत्रमा चल्दैन स्वदेशी सिम

Technology Khabar २४ भाद्र २०७८, बिहीबार

भारतसँग जोडिएको सीमाक्षेत्रमा चल्दैन स्वदेशी सिम

भारतसँग जोडिएको दाङको सीमाक्षेत्रमा नेपाल टेलिकमको नेटवर्क नहुँदा समस्या भएको सीमाक्षेत्रमा बस्ने नेपालीले बताएका छन् ।

राजपुर गाउँपालिका विशेषगरी सीमाक्षेत्रमा नेपाल टेलिकमको नेटवर्क नहुँदा भारतसँग जोडिएका दाङका अधिकांश नाकाक्षेत्रमा बसोवास गर्ने सर्वसाधारणलाई सम‚या भएको नाकावासीको भनाइ छ ।

गाउँपालिकाको अधिकांश (१, ६ र ७) वडाको बस्तीमा टेलिकमको नेटवर्क नआउँदा फोन गर्न डाँडा खोज्दै हिँड्नुपर्ने बाध्यता रहेको स्थानीयको गुनासो छ ।

राजपुर गाउँपालिका वडा नम्बर ६ भैसाहिनाका निवासी पूर्णबहादुर रोकाले सीमाक्षेत्रमा नेपाल टेलिकमको टावर निर्माण थालेको दुई वर्ष हुन लाग्दा पनि हालसम्म सञ्चालनमा नआएको बताए । उनले भने,”घरबाट टेलिकमको टावर देखिन थालेको दुई वर्ष भयो तर आजसम्म मोबाइलमा नेटवर्क छैन् ।’’

राजपुर गाउँपालिका वडा नम्बर ७ भौवानका मङ्गल सेनले नाकाको मुख्य समस्या भनेकै सञ्चार भएको बताए । उनले भने, “सञ्चार सेवा नहुँदा धेरै कामबाट वञ्चित हुनुपरेको छ । एक कल फोन गर्न डाँडाकाँडामा उक्लिनुपर्ने बाध्यता छ।”

भारतसँग सीमा जोडिएको दाङमा साना ठूला गरी ३४ वटा सीमा नाकाक्षेत्र छन् । जसमध्ये गढवा गाउँपालिका वडा नम्बर ८ कोइलाबास नाकाबाहेक अन्य कुनै पनि नाकाक्षेत्रमा सञ्चारको सेवा नहुँदा बर्सेनि नाकावासीले सास्ती खेप्दै आएका हुन् ।

नाकामा बसोवास गर्ने स्थानीयले भारतीय सिम प्रयोग गर्नुपर्ने बाध्यता छ । यता, राजपुर गाउँपालिका अध्यक्ष लोकराज केसीले नाकाक्षेत्रमा टावर निर्माणको काम अन्तिम चरणमा पुगेको बताए।

“राजपुरको पटौली नाका र ७ नम्बर वडाको सुनपत्थरी नाका जोड्ने भीरमा टावर निर्माण लगभग अन्तिम चरणमा पुगेको छ, केही प्राविधिक कुरा बाँकी छन्, त्यो पनि अब दुई महिनाभित्रमा सञ्चालनमा ल्याउने तयारीमा छौं,” अध्यक्ष केसीले भने । गोरखापत्र

TK Viber

प्रकाशित: २४ भाद्र २०७८, बिहीबार

Loading...