अनलाइन माध्यमबाट विद्यार्थीको अन्तिम वार्षिक परीक्षा लिईँदै

Technology Khabar १२ जेष्ठ २०७८, बुधबार

अनलाइन माध्यमबाट विद्यार्थीको अन्तिम वार्षिक परीक्षा लिईँदै
Classic Tech

कोरोना महामारीका कारण भौतिक उपस्थितिमा परीक्षा सञ्चालन गर्न सम्भव नभएपछि विद्यालयले वैकल्पिक विधिबाट विद्यार्थीको अन्तिम वार्षिक परीक्षा लिन थालेका छन् । जेठभित्र परीक्षा सञ्चालन, नतिजा प्रकाशन कार्य पूरा गरी असारबाट नयाँ शैक्षिक सत्र सुरु गर्ने योजनाका साथ राजधानीका सामुदायिक विद्यालय यसको तयारीमा जुटेका हुन् ।

भौतिक उपस्थितिमा परीक्षा सम्भव नभएपछि विद्यालयले अनलाइन माध्यम, परियोजना गृहकार्य, मोबाइलबाट मौखिक परीक्षा, निरन्तर विद्यार्थी मूल्याङ्कनलगायतको माध्यमबाट विद्यार्थीको सिकाइ उपलब्धिको मूल्याङ्कन गर्ने कार्य सुरु गरेका छन् ।

राजधानीको सरस्वती निकेतन माध्यमिक विद्यालयले अनलाइन माध्यमका आधारमा विद्यार्थीको अन्तिम वार्षिक परीक्षा लिन सुरु गरेको छ । अनलाइनमा जोडिन सम्भव नहुने विद्यार्थीलाई टेलिफोनबाट परीक्षा लिइएको छ । परीक्षा जेठ १४ गते सक्ने विद्यालयको योजना छ । सो विद्यालयका प्रधानाध्यापक रविना महर्जनले माथिल्लो कक्षाका ८० प्रतिशत जति विद्यार्थी अनलाइनमा जोडिएकाले परीक्षा सञ्चालनमा सहज भएको बताए।

फोनमा समेत सम्पर्क हुन नसक्ने केही विद्यार्थीलाई निरन्तर विद्यार्थी मूल्याङ्कनको माध्यमबाट कक्षा स्तरोन्नति गरिने प्रअ महर्जनले जानकारी दिए । यसअघि यो विद्यालयले विद्यार्थीको भौतिक उपस्थितिमा दुई पटक परीक्षा लिइसकेका कारण त्यसको समेत आधारमा विद्यार्थीको अन्तिम सिकाइ उपलब्धि मूल्याङ्कन गरिने जनाइएको छ ।

राजधानीकै जनपथ माध्यमिक विद्यालयले अनलाइनमा उपलब्ध विद्यार्थीलाई सोही माध्यमबाट परीक्षा लिने भएको छ । जेठ १३ गतेदेखि परीक्षा सुरु गरी २२ गतेसम्म सक्ने विद्यालयको कार्यतालिका छ । सबै विद्यार्थी अनलाइनमा जोडिन नसकेकाले केही विद्यार्थीलाई मोबाइलमा प्रश्न सोधेर पनि अन्तिम परीक्षा लिइने विद्यालयका प्रधानाध्यापक जितबहादुर लामिछानेले जानकारी दिए । विद्यालयले टेलिफोनमा सम्पर्क हुन नसक्ने विद्यार्थीलाई निरन्तर विद्यार्थी मूल्याङ्कनबाट समेत विद्यार्थीको सिकाइ उपलिब्धको परीक्षण गर्नेछ ।

ललितपुरको आदर्श सौल माध्यमिक विद्यालयले अनलाइनबाटै परीक्षा लिने तयारी गरेको जनाएको छ । जेठ १३ गतेदेखि नै परीक्षा सुरु गरी २१ गते परीक्षा सक्ने विद्यालयको योजना छ । अनलाइनमा जोडिन नसकेका विद्यार्थीलाई घरमा नै परियोजना कार्य दिएर परीक्षा लिइने विद्यालयका प्रअ सरोजभक्त आचार्यले जानकारी दिए । यसका अतिरिक्त फोनबाटै पनि परीक्षा लिने योजना बनाइएको छ । परीक्षा सकिएपछि पुनः समीक्षा गरी छुट भएका विद्यार्थीको परीक्षा कसरी लिइने उनले जानकारी दिए।

विद्यालयहरूले कक्षा ६ भन्दा तल्लो तहका विद्यार्थीलाई भने परीक्षाभन्दा निरन्तर विद्यार्थी मूल्याङ्कन र यसअघि विद्यायलले सञ्चालन गरेको पहिलो र दोस्रो त्रैमासिक परीक्षाका आधारमा निर्णय गर्ने भएका छन् ।

काठमाडौँ महानगरपालिकाले जेठ २० गतेसम्म परीक्षाको सबै कार्य पूरा गरी असार पहिलो सातादेखि नयाँ शैक्षिक सत्र सुरु गर्न मातहतका सबै विद्यालयलाई निर्देशन दिइसकेको छ । सरकारले नयाँ शैक्षिक सत्र २०७८ सालको असारबाट सुरु गर्ने निर्णय यसअघि नै गरिसकेको छ । गोरखापत्रअनलाइनबाट

TK Viber

प्रकाशित: १२ जेष्ठ २०७८, बुधबार

Loading...