शव व्यवस्थापनका लागि बनाउन लागिएको रोबो भ्यानको काम रोकियो

Technology Khabar ३० बैशाख २०७८, बिहीबार

शव व्यवस्थापनका लागि बनाउन लागिएको रोबो भ्यानको काम रोकियो

कोरोना भाइरस तथा भाइरसजन्य रोगका कारण मृत्यु भएका व्यक्तिको शव व्यवस्थापनका लागि मानिसले छुनु नपर्ने गरी सहयोग गर्ने निर्माण गर्न लागिएको ‘रोबो भ्यान’ निर्माणको कार्य बीचैमा रोकिएको छ ।

गत वर्ष साउनमा काठमाडौँ विश्वविद्यालय (केयु) स्कुल अफ इन्जिनियरिङमा अध्ययनरत छ जना विद्यार्थीको समूहले अभियान्त्रिक कर्मशाला टिम बनाएर रोबो भ्यान बनाउने काम अघि बढाएका थिए ।

गत कात्तिक महिनाभित्र रोबो भ्यान निर्माण सम्पन्न गर्ने लक्ष्यले काम सुरु गरिएको थियो ।

रिमोटबाट चल्ने रोबो भ्यानका डिजाइनर अभिषेक कार्कीले रोबो भ्यान निर्माणका लागि आवश्यक पर्ने सामान नपाउनुका साथै आर्थिक अभावमा भ्यान निर्माणको काम बीचैमा रोकिएको बताए ।

यसअघि आफ्ना विद्यार्थीले अघि सारेको रोबो भ्यान बनाउने योजनालाई विश्वविद्यालयले नेपाल एकेडेमी अफ साइन्स एन्ड टेक्नोलोजी (नास्ट) मा प्रस्ताव पेस गरेको थियो । केयूका विद्यार्थीले पेस गरेको प्रस्ताव नास्टले स्वीकृत गरेको थियो ।

नेपालमा नै पहिलो पटक निर्माण सुरु गरिएको रोबो भ्यान निर्माणका लागि करिब १० लाख रुपियाँ लाग्ने र रोबो भ्यान निर्माणका लागि नास्टले काठमाडौँ विश्वविद्यालयलाई १० लाख रुपियाँ सहयोग उपलब्ध गराएको थियो ।

योजनाअनुसार रोबो भ्यान दुई भागको रहेको छ । रिमोट कन्ट्रोलका माध्यमबाट एउटा भागले मृत शरीरलाई उचालेर रोबो भ्यानमा राख्ने र अर्को भागले मृत शरीरलाई रोबो भ्यानबाट शव वहानमा राख्न सहयोग गर्छ । गत कात्तिकमा नै सो बारेमा जानकारी दिँदै समूहले करिब तीन महिनाअघिबाट सुरु गरिएको रोबो भ्यान बनाउने कामको एउटा भागको करिब ९० प्रतिशत काम सकिएको दाबी गरिएको थियो । डमी मृत शरीर राखेर रोबोको परीक्षणसमेत गरिसकिएको  थियो ।

रोबो भ्यान बनाउन कार्कीको नेतृत्वमा सञ्जीव पोख्रेल, शैलेश भट्ट, आर्जन आचार्य, विशाल भेटवाल र सुदीप फुयाँल सक्रिय रहेका छन् ।

TK Viber

प्रकाशित: ३० बैशाख २०७८, बिहीबार

Loading...