सहकारीहरुबीच पनि विद्युतीय भुक्तानी कारोबार शुरु

Technology Khabar २० बैशाख २०७८, सोमबार

सहकारीहरुबीच पनि विद्युतीय भुक्तानी कारोबार शुरु
Classic Tech

नेपाल बचत तथा ऋण केन्द्रीय सहकारी संघ (नेफ्सकुन) ले अन्तरसहकारी विद्युतीय भुक्तानी कारोबार सुरु गरेको छ । सूचना प्रविधि दिवसको अवसरमा आइतबार अभौतिक कार्यक्रम गरी सेवाको सुरुआत गरिएको हो ।

नेफ्सकुनमा आबद्ध साकोसहरूको सहजताका लागि भुक्तानी सेवा सुरु गरिएको नेफ्सकुनका अध्यक्ष परितोष पौड्यालले जानकारी दिए।

नेफ्सकुनले यो सेवालाई ‘कनेक्ट साकोस’ को नाम दिएको छ ।

अध्यक्ष पौड्यालका अनुसार अन्तरसहकारी भुक्तानी कारोबारमा अब नेफ्सकुनका सदस्यद्वारा जारी भुक्तानी पुर्जा फरफारक तथा अन्तर साकोस सदस्यहरूबीच भुक्तानी सेवामा सहजता हुनेछ ।

नेफ्सकुनले क्लियरिङ हाउसको रुपमा काम गर्नेछ । जुन सहकारीमा सदस्य भएपनि नेटवर्कमार्फत् काम गर्न सकिने छ । सहकारीमै उपस्थित हुनुपर्ने बाध्यताको अन्त्य भएको छ । यस सेवामार्फत सङ्घमा आवद्ध सबै संस्थाहरूको भुक्तानी पुर्जा सङ्घका कुनै पनि सदस्य संस्थामा गई सहटी गर्न सक्नेछन्।

मोबाइल बैङ्किङको उपयोग गरी संस्था–संस्था र सदस्यहरूबीचमा रकम स्थानान्तरण गर्न सकिने छ। संस्थाका सदस्यले संघमा आवद्ध कुनै पनि संस्थाबाट बचत जम्मा गर्न तथा फिर्ता लिने सुविधा हुनेछ ।

संस्थाका सदस्यहरूले नजिकको सदस्य संस्थाबाट बचत जम्मा गर्न, बचत फिर्ता लिन तथा मोबाइल बैङ्किङमार्फत बचत जम्मा गर्ने, भुक्तानी दिने, रकमान्तर गर्ने लगायतका सुविधा घरमै बसेर प्राप्त गर्न सक्ने पौड्यालले बताए ।

यसले दोहोरो सदस्यता अन्त्यका लागि सहयोगी भूमिका खेल्न पनि बताइएको छ । पहिलो चरणमा नेफ्सकुनमा सदस्य भएका नेपाल भरका सहकारीहरू सहभागी हुनेछन् ।

आगामी दिनमा इआरपी प्रणालीमा जाने तयारी भइहेको पौड्यालले जानकारी दिए । गोरखापत्रबाट

TK Viber

प्रकाशित: २० बैशाख २०७८, सोमबार

Loading...