Technology Khabar १७ बैशाख २०७८, शुक्रबार
काठमाडौं ।
कोरोना संक्रमणको जोखिम बढ्दै गएपछि जारी भएको निषेधाज्ञाको समयमा बीमा समितिले इजाजतपत्र प्राप्त सबै बीमा कम्पनीहरुका लागि सेवा प्रवाह गर्नेसम्बन्धमा आवश्यक निर्देशन जारी गरेको छ।
समितिले निषेधाज्ञा अवधिभर विद्युतीय माध्यमबाट बीमालेख जारी तथा नवीकरण गर्न निर्देशन दिएको छ।
निर्देशनअनुसार निर्जीवन बीमकले तत्काल सिर्जना हुने दाबीभुक्तानीका लागि विद्युतीय माध्यमबाट समेत निवेदन प्राप्त भएमा निषेधाज्ञाको अवधिमा समाप्त भएपछि सर्भेयर खटाई क्षति यकिन गरी दाबीभुक्तानी गर्नुपर्नेछ।
बीमालेख अनलाइन विधिबाट जारी गर्न सकिने र त्यसरी जारी गर्दा अनिवार्य रुपमा बीमा मितिबाट जारी भएका ऐन, नियम र निर्देशिका साथै बीमकको अन्डरराइटिङ म्यानुअलको अधीनमा रही गर्नुपर्नेछ।
त्यस्तै बीमालेखको प्रस्ताव फाराम अनलाइनमार्फत भराउने र पर्याप्त रुपमा बीमा जोखिमांकन गरी बीमालेख जारी गर्न सकिने, बीमालेखको प्रस्ताव फाराम भर्दा ग्राहक पहिचान फाराम, फोटोलगायत अन्य जानकारीसमेत लिने व्यवस्था गर्नुपर्नेछ। बीमालेखअन्तर्गतको बीमाशुल्क विभिन्न बैंक तथा वित्तीय संस्थाहरुको मोबाइल/ईबैंकिङ तथा अनलाइन सेवा प्रदायकमार्फत समेत भुक्तानी गर्न सकिने समितिको निर्देशनमा उल्लेख छ।
यसैगरी बीमालेख जारी गर्दा टिकटबापतको शुल्कसमेत लिने र टिक टास्ने व्यवस्था बीमकले गर्ने साथै बीमालेख ‘This is electronically generated policy hece, bears no signature and the duty stamped original policy will be provided after the lockdown period’ भन्ने वाक्यांशसहित ईमेलमार्फत बीमालेखको सफ्ट कपी पठाउनुपर्ने व्यवस्था गर्न सबै बीमा कम्पनीहरुलाई निर्देशन दिएको छ।
यस बाहेक बीमकहरुले आवश्यक बीमा सेवा प्रवाह गर्नुपर्ने कार्यका लागि आवश्यक पर्ने कर्मचारीहरुमध्ये एक तिहाइ कर्मचारीहरुद्वारा आलोपालोमा सेवा सञ्चालन गर्न निर्देशन दिएको छ।
परिपत्र-१५प्रकाशित: १७ बैशाख २०७८, शुक्रबार