चिकित्सा शिक्षामा स्नातक तहको भर्ना शुल्क खल्तीबाट भुक्तानी गर्न सकिने

चिकित्सा शिक्षा स्नातक तहका शैक्षिक कार्यक्रमहरूमा भर्नाका लागि लिइने एकीकृत परीक्षाको अनलाइन आवेदन फारम शुल्क खल्ती डिजिटल मोबाइल वालेटबाट भुक्तानी गर्न सकिने भएको छ ।

चिकित्सा शिक्षा आयोगले एमबीबीएस, बीडीएस, बीएससी नर्सिंङ, बीपीएस, बी फर्मा, बी अप्टोमेट्री, बी पीटी, बिएनएस लगायतका शैक्षिक कार्यक्रममा भर्नाका लागि आवेदन आह्वान गरेको छ । ती विषयमा भर्नाका लागि प्रवेश परीक्षामा सहभागी हुन आयोगको वेबसाइटमा चैत्र ९ गतेदेखि वैशाख १२ गतेसम्म अनलाइनबाटै आवेदन दिन सकिन्छ ।

अनलाइनमार्फत आवेदन फाराम भरेपछि शुल्क भुक्तानीको विकल्पमा खल्ती डिजिटल वालेट छनौट गर्नुपर्छ । खल्ती छनौट गरेपछि आफ्नो युजरनेम र पासवर्ड हालेर लग-इन गरेपछि तोकिएको शुल्क भुक्तानी खल्तीबाट गर्न सकिन्छ।

खल्तीमा भुक्तानीपछि चिकित्सा शिक्षा आयोगको वेबसाइटमा गएर ट्रान्ज्याक्सन आइडीको अन्तिमको ६ अंक राखी बाँकी फारम भर्नु पर्ने हुन्छ।