सञ्चार मन्त्रालयको आगामी आर्थिक वर्षको बजेट ७ अर्ब २१ करोड रुपैयाँ

सञ्चार तथा सुचना प्रविधि मन्त्रालयले आगामी आर्थिक वर्षको लागि बजेटको सिलिङ पाएको छ।

राष्ट्रिय योजना आयोगले सञ्चार तथा सुचना प्रविधि मन्त्रालयको लागि आगामी आर्थिक वर्ष २०७८/७९ को लागि बजेट सिलिङ तोकिदिएको हो ।

आयोगले तोकेको बजेट चालु आवको हाराहारीमा नै रहेको छ भने थोरै रकम घटेको देखिन्छ।

सञ्चार तथा सुचना प्रविधि मन्त्रालयले आर्थिक वर्ष २०७८/७९ को लागि ७ अर्ब २१ करोड ७८ लाख बराबरको बजेट सिलिङ पाएको छ । चालु आर्थिक वर्षका लागि ७ अर्ब २८ करोड ४२ लाख रुपैयाँ बजेट विनियोजन भएको थियो ।

सञ्चार मन्त्रालयका सहसचिव तथा प्रवक्ता शोभाकान्त पौडेलले मन्त्रालयलाई तोकिएको सिलिङ्गको आधारमा छलफल भईरहेको जानकारी दिए ।

‘हामीलाई आयोगबाट तोकिएको सिलिङ्गअनुसारको बजेट कार्यक्रमबारे छलफल हुँदैछ। आगामी आवमा डिजिटल नेपालको अभियानलाई ससक्तरुपमा बजेटमा समावेश गरेर लानेछौं,’ प्रवक्ता पौडेलले भने ।

मन्त्रालयले आगामी आवका लागि डिजिटल नेपालको अभियानलाई अगाडी बढाउने र सूचना प्रविधिको प्रयोगलाई जोड दिने तयारी गरेको छ ।

त्यसैगरि मन्त्रालयले दूरसञ्चार सेवाको गुणस्तर सुधार गर्नका लागि पनि बजेट छुट्याउनेछ। मन्त्रालयले सञ्चार मन्त्री पार्वत गुरुङको नेतृत्वमा यसको लागि संघिय सांसदहरुसँग निरन्तर छलफल गरिरहेको छ भने सरोकारबालाहरुसँग समेत सुझाब माग गरेको छ।