फेसबुकद्धारा अष्ट्रेलियामा न्युज फिडमा समाचार पढ्न र सेयर गर्न बन्द

Technology Khabar ६ फाल्गुन २०७७, बिहीबार

फेसबुकद्धारा अष्ट्रेलियामा न्युज फिडमा समाचार पढ्न र सेयर गर्न बन्द
Classic Tech

सामाजिक सञ्जाल फेसबुकले अष्ट्रेलियामा प्रयोगकर्ताहरुका लागि न्युज फिडमा समाचार पढ्न र सेयर गर्न बन्द गरिदिएको छ।

अष्ट्रेलिया सरकारले ल्याउन लागेको प्रस्तावित नयाँ कानुनको विरोधमा फेसबुकले अष्ट्रेलियाका मिडियालाई फेसबुकमा समाचार सामग्री सेयर गर्न बन्द गरिदिएको बीबीसीले जनाएको छ।

अष्ट्रेलियाको प्रस्तावित कानुनमा फेसबुक र गुगलले मिडियाको सामाग्रीहरु आफ्नो फ्लेटफर्ममा राखेबापत मिडिया कम्पनीहरुलाई पैसा तिर्नुपर्ने व्यवस्था छ।

अष्ट्रेलियालीहरु बिहिबार बिहान उठेसँगै सबै स्थानीय र ग्लोबल समाचार साइटहरुको फेसबुक पेजहरु अनुपलब्ध थिए।

धेरै सरकारी स्वास्थ्य र आपतकालीन पृष्ठहरू पनि अवरुद्ध गरिएको थियो तर केही पछि फेसबुकले त्यो गल्ती भएको बताएको थियो।

अब अष्ट्रेलियाली बाहिरका व्यक्तिहरूले प्लेटफर्ममा कुनै पनि अष्ट्रेलियाली समाचार प्रकाशनहरू पढ्न वा पहुँच गर्न असक्षम भएका छन्।

अस्ट्रेलिया सरकारले यो कदमको कडा आलोचना गरेको छ र यसो भन्दै यसले ‘यी डिजिटल सामाजिक जायन्टहरुले बजार शक्ति’ प्रदर्शन गरेको आरोप लगाएको छ।

यसअघि देखि नै गुगल र फेसबुकले सो नयाँ आउने कानूनको विरोध गरिरहेका छन् ।

तर गुगलले केहि दिनअघि अष्ट्रेलियाका मिडियालाई रकम दिने नयाँ प्लेटफर्म ल्याएको थियो । बुधबार उसले अष्ट्रेलियाका विभिन्न सहरमा प्रकाशित हुने समाचार पत्रका मालिक रूपर्ट मुड्रोचको न्यूज कर्प कम्पनीसँग सब्क्रिप्सन प्लेटफर्म बनाउने र विज्ञापनको आम्दानी बाँड्ने सम्झौता गरेको छ। उसले यसअघि यस्तो सम्झौता बेलायत, जर्मनी, फ्रान्स, ब्राजिल र अर्जेन्टिनाका मिडिया हाउससँग गरिसकेको छ।

उता फेसबुकले आफूले कुनै मिडियाको सामाग्री चोर्ने नभई प्रकाशकहरूले नै आफ्नो समाचारको रिच बढाउन फेसबुकमा समाचार सेयर गर्ने गरेकाले पैसा तिर्ने कानुन ल्याउन नमिल्ने बताएको छ।

फेसबुकमा समाचार सेयर गरेर सन् २०२० मा अष्ट्रेलियन मिडिया हाउसले ४०७ मिलियन अष्ट्रेलियन डलर कमाएको उसको दाबी छ। तर आफूले भने समाचारबाट निकै कम आम्दानी गरेको बताएको छ ।

गत जनवरीमा अष्ट्रेलियाको सिनेटमा भएको सुनुवाइका क्रममा फेसबुकले प्रस्तावित विधेयक कानुन भए आफूले अष्ट्रेलियाली प्रयोगकर्ताको न्युज फिडमा समाचार आउनै नदिने बताएको थियो भने गुगलले सर्च इन्जिन नै बन्द गर्ने चेतावनी दिएको थियो। विधेयकबारे अहिले सिनेटमा छलफल चलिरहेको छ।

पछिल्लो समय भने गुगलले फेसबुकभन्दा फरक बाटो समात्ने संकेत देखाएको छ। उसले अष्ट्रेलिया छोड्नेभन्दा त्यहाँका मिडिया हाउससँग गहिरो सम्बन्ध बनाउने भएको छ।

फेसबुकले समाचार बन्द गरेपछि मिडिया हाउसका समाचारमात्र होइन अन्य सरकारी निकायका सूचनाहरू पनि फेसबुकमा देखिन छोडेका छन्। अष्ट्रेलियाको मौसम विभागले मौसमसम्बन्धी जानकारी सोझै वेवसाइटमा गएर हेर्न भनेको छ।

TK Viber

प्रकाशित: ६ फाल्गुन २०७७, बिहीबार

Loading...