यी हुन् ‘बिलियन क्लब’ मा रहेका नेपाली इन्टरनेट सेवा प्रदायक कम्पनीहरु

Technology Khabar २० माघ २०७७, मंगलवार

यी हुन् ‘बिलियन क्लब’ मा रहेका नेपाली इन्टरनेट सेवा प्रदायक कम्पनीहरु
Classic Tech

नेपालमा अर्ब रुपैयाँ आम्दानी गर्ने इन्टरनेट सेवा प्रदायक कम्पनीहरु केबल २ वटा मात्र रहेको देखिएको छ।

नेपाल दूरसञ्चार प्राधिकरणबाट अनुमति प्राप्त इन्टरनेट सेवा प्रदायकहरुको गत आर्थिक वर्षको तथ्यांक हेर्दा २ वटा प्रमुख कम्पनीहरुले मात्र अर्बमा आम्दानी गर्न सफल भएका छन् ।

प्राधिकरणबाट उपलब्ध पुस मसान्तसम्म वित्तीय बिबरण बुझाउने इन्टरनेट सेवा प्रदायहरुमध्ये वर्ल्डलिंक कम्युनिकेसन्स लिमिटेड र सुबिसु केबलनेट प्रालिले मात्र अर्बमा आम्दानी गर्न सफल भएका छन् ।

त्यसबाहेकका अन्य इन्टरनेट कम्पनीहरुले करोडमा आम्दानी गरिरहेका छन् । १० करोड भन्दा बढि आम्दानी गर्ने कम्पनीहरु निकै भएपनि अर्ब क्लबमा पर्ने इन्टरनेट सेवा प्रदायक भने २ वटा मात्र हुन् ।

गत आर्थिक वर्ष २०७६।७७ मा सबैभन्दा धेरै आम्दानी गर्न सफल भएको वर्ल्डलिंकले २ अर्ब ९५ करोड ५६ लाख २५ हजार रुपैयाँ आम्दानी गर्न सफल भएको छ ।

त्यसैगरि दोस्रो स्थानमा रहेको सुबिसु केबलनेटले भने १ अर्ब ४२ करोड ५३ लाख ५५ हजार ५३५ रुपैयाँ आम्दानी गरेको छ ।

नेपालको दूरसञ्चार क्षेत्रमा कोभिड-१९ को असर, अघिल्लो आवको तुलनामा ११ अर्ब बढीले संकुचित

अर्ब क्लब अर्थात ‘बिलियन क्लब’ मा भएका इन्टरनेट सेवा प्रदायकहरु बाहेक हेर्ने हो भने तेस्रो स्थानमा भायनेट कम्युनिकेसन्स प्रालि रहेको छ । जसले ८० करोड १२ लाख ३६ हजार ८२५ रुपैयाँ मात्र आम्दानी गर्न सकेको छ ।

अर्ब क्लबमा रहेको मध्ये वर्ल्डलिंकले इन्टरनेट सेवा प्रदायकहरु मध्ये सबैभन्दा धेरै ग्रामिण दूरसञ्चार विकास कोष(आरटिडिएफ) र रोयल्टी रकम तिरेको छ ।

प्राधिकरणको तथ्यांकअनुसार वर्ल्डलिंकले ५ करोड ९१ लाख १२ हजार ५ सय रुपैयाँ कोषमा आम्दानीको २ प्रतिशतको दरले प्राधिकरणलाई बुझाएको छ भने ४ प्रतिशत रोयल्टी बापत सरकारलाई ११ करोड ८२ लाख २५ हजार रुपैयाँ भुक्तानी गरेको छ ।

अर्कोतर्फ दोस्रो धेरै आम्दानी गर्ने इन्टरनेट सेवा प्रदायक सुबिसुले प्राधिकरणलाई कोषमा २ करोड ८५ लाख ७ हजार ११० रुपैयाँ बुझाएको छ भने सरकारलाई रोयल्टी बापत ५ करोड ७० लाख १४ हजार २२१ रुपैयाँ तिरेको छ ।

कात्तिकसम्मको एमआईएस डाटा हेर्दा वर्ल्डलिंकले सबैभन्दा धेरै ग्राहकहरु बनाउन सफल भएको देखिएको छ । कम्पनीसँग सो अवधिसम्म ४ लाख २२ हजार १९९ जना सेवाग्राही छन् ।

त्यसैगरि अर्को कम्पनी सुबिसुले कात्तिक महिनासम्म १ लाख ६८ हजार ८९० जना ग्राहक बनाउन सफल भएको छ ।

यी दुबै कम्पनीहरुले वायरलेस, केबल र फाइबरमार्फत इन्टरनेट सेवा दिँदै आएका छन् ।

यी दुई इन्टरनेट सेवा प्रदायक कम्पनीहरु बाहेक टेलिकम अपरेटरहरुले मात्र अर्बमा आम्दानी गरेको तथ्यांकमा देखिन्छ ।

प्राधिकरणको तथ्यांकअनुसार हालसम्म १२७ इन्टरनेट सेवा प्रदायक कम्पनीहरुले अनुमति प्राप्त गरेका छन् ।

यो पनि हेर्नुहोस्-

आम्दानीको आधारमा गत आर्थिक वर्षमा एनसेलले नेपाल टेलिकमलाई उछिन्यो, यस्तो छ तथ्यांक

TK Viber

प्रकाशित: २० माघ २०७७, मंगलवार

Loading...