साइबर सेक्यूरिटी अडिटमा नेपाली फर्महरुलाई प्राथमिकता, धेरैलाई सहभागी गराउन म्याद थपियो

Technology Khabar १४ माघ २०७७, बुधबार

साइबर सेक्यूरिटी अडिटमा नेपाली फर्महरुलाई प्राथमिकता, धेरैलाई सहभागी गराउन म्याद थपियो
फाइल फोटो
Classic Tech

नेपाल दूरसञ्चार प्राधिकरणले साइबर सेक्यूरिटी अडिट गर्नको लागि तयार पार्न लागेको रोस्टरमा सहभागी हुनका लागि समय थप गरेको छ।

प्राधिकरणले यसैवर्षदेखि दूरसञ्चार सेवा प्रदायक कम्पनीहरुको साइबर सेक्यूरिटी अडिट गर्न लागेको छ । त्यसैको लागि प्राधिकरणले साइबर सेक्यूरिटी फर्महरुको रोस्टर तयार पार्न लागेको हो।

यसको लागि प्राधिकरणले गत डिसेम्बर ३० तारिखमा पहिलो पटक सार्वजनिक सूचना जारी गर्दै तोकिएको मापदण्ड र योग्यता पुग्ने कम्पनी तथा विज्ञहरुलाई रोस्टरमा सहभागी हुन आग्रह गरेको थियो ।

साइबर सेक्युरिटी अडिटरको रोस्टर तयार पार्दै दूरसञ्चार प्राधिकरण

हालै दोस्रो पटक सूचना निकाल्दै तोकिएको मापदण्ड र योग्यता पुग्ने फर्म तथा विज्ञहरुलाई रोस्टरमा सहभागी हुन आग्रह गरेको छ ।

विशेषगरि नेपाली साइबर सेक्यूरिटी फर्महरु तथा विज्ञहरुलाई ध्यानमा राखेर रोस्टरमा सहभागी हुने मिति थप गरिएको प्राधिकरणले जनाएको छ ।

प्राधिकरणका निर्देशक बिजयकुमार रोयले नेपाली साइबर सेक्यूरिटी फर्महरुलाई थप सहभागी बनाउन म्याद थप गरिएको बताएका छन् । उनले दूरसञ्चार क्षेत्र निकै महत्वपूर्ण क्षेत्र भएको र यसको साइबर सेक्यूरिटी अडिटले नेपाली संस्थाहरुको क्षमता समेत बढाउने बताए ।

‘हामीले नेपाली फर्महरुलाई ध्यानमा राखेर म्याद बढाएका हौं, नेपाली फर्महरुलाई धेरै भन्दा धेरै सहभागी गराउन सकिएमा उनीहरुको समेत क्षमता अभिवृद्धि हुनेछ,’ निर्देशक रोयले भने ।

उनकाअनुसार दूरसञ्चार प्राधिकरणबाट अनुमति प्राप्त सम्पूर्ण टेलिकम तथा इन्टरनेट सेवा प्रदायक कम्पनीहरुले अनिवार्य साइबर सेक्यूरिटी अडिट गर्नुपर्ने कानूनी प्रावधानका कारण नेपाली साइबर सेक्यूरिटी फर्महरु समेत अनुभवी हुनसक्नेछन् ।

प्राधिकरणले यसअघि पहिलो पटक माग गरेको आवेदनमा नेपालीसहित विदेशी साइबर सेक्यूरिटी फर्महरुसमेत सहभागी भएका छन् । जसमा नेपाली बाहेक भारत, यूएई, मलेशियालगायतका साइबर सेक्यूरिटी फर्महरु आएका छन् ।

प्राधिकरणबाट हाल विभिन्न ११ क्याटोगोरीमध्ये टेलिकम अपरेटरहरु ६ वटा नेटवर्क सर्भिस प्रदायक १७ वटा, इन्टरनेट सेवा प्रदायक १२७ वटा सहित १५० भन्दा बढि कम्पनीहरु संचालनमा रहेका छन् । यी सबै कम्पनीहरुले अनिवार्यरुपमा साइबर सेक्यूरिटी अडिट गर्नुपर्नेछ ।

थपिएको म्यादअनुसार आगामी फेब्रुअरी ५ तारिखभित्र प्राधिकरणमा आवेदन दिनुपर्नेछ ।

यो पनि हेर्नुस्-

सबै दूरसञ्चार सेवा प्रदायकहरुले सूचना प्रणालीको अनिवार्य सेक्यूरिटी अडिट गर्नुपर्ने

TK Viber

प्रकाशित: १४ माघ २०७७, बुधबार

Loading...