विद्यालयमा आविष्कार कार्यक्रम गर्दै महानगरपालिका

Technology Khabar १३ माघ २०७७, मंगलवार

विद्यालयमा आविष्कार कार्यक्रम गर्दै महानगरपालिका
Classic Tech

सामुदायिक विद्यालयमा अध्ययन गर्ने विद्यार्थीको सिर्जनात्मक क्षमता अभिवृद्धि गर्न काठमाडौँ महानगरपालिकाले ‘आविष्कार कार्यक्रम’ सञ्चालन गर्ने भएको छ ।

विज्ञान, प्रविधि, इन्जिनियरिङ, कला तथा गणितमा विद्यार्थीको सिर्जनात्मक पक्षको विकास तथा प्रस्फुटन गर्न महानगरभित्रका २५ वटा विद्यालयमा यो कार्यक्रम सञ्चालन गरिने भएको हो ।

महानगरपालिकाले यसका लागि विद्यालय छनोट गरी सम्झौतासमेत गरिसकेको छ ।

काठमाडौँ महानगर शिक्षा शाखाका अधिकृत मोतीप्रसाद भट्टराईले विद्यार्थीमा सिर्जनात्मक क्षमता अभिवृद्धि गर्न महानगरको आन्तरिक स्रोतबाट यस खालको कार्यक्रम कार्यान्वयनमा ल्याइएको जानकारी दिए । उनका अनुसार कक्षा ५ देखि ९ कक्षासम्म अध्ययन गर्ने विद्यार्थीको सिर्जनात्मक पक्ष सबल बनाउन हरेक माध्यमिक विद्यालयमा २० जनासम्मको समूह निर्माण गरिने छ ।

उक्त समूहले महिनामा दुईपटक बैठक बसेर प्राप्त नयाँ सिर्जनालाई विद्यालयमा साथीहरूसँग आदानप्रदान गर्नेछन् ।

विज्ञान, प्रविधि, इन्जिनियरिङ, कला र गणितमा विद्यार्थीले नयाँ कुराको सिर्जना गर्नुपर्नेछध्र विद्यार्थीको सिर्जनामा सहयोग होस् भनेर महानगरले हरेक विद्यालयलाई यसपटक एक लाख रुपियाँ सहयोग उपलब्ध गराएको छ ।

विज्ञान शिक्षकलाई समूहको अगुवा तोकिएको छ । यसका साथै विद्यालयले आफ्नो आन्तरिक स्रोत भएको अवस्थामा थप बजेटसमेत समूहलाई उपलब्ध गराउन सक्नेछन् । कार्यक्रमको संयोजन गर्ने जिम्मेवारी शिवपुरी माध्यमिक विद्यालयलाई दिइएको छ ।

यस समूहमा आबद्ध भएका विद्यार्थीबाट गरिएको सिर्जनालाई प्रदर्शनी गर्ने उद्देश्य राखिएको छ । एक अर्को विद्यालयका विद्यार्थीबाट भएको सिर्जनात्मक पक्षको अनुभव आदानप्रदान हुँदा विद्यार्थीको क्षमतामा अभिवृद्धि हुने जनाइएको छ ।

TK Viber

प्रकाशित: १३ माघ २०७७, मंगलवार

Loading...