सञ्चार मन्त्रालयको चालु आर्थिक वर्षको विकास खर्च ४ करोड रुपैयाँ मात्र !

Technology Khabar १२ माघ २०७७, सोमबार

सञ्चार मन्त्रालयको चालु आर्थिक वर्षको विकास खर्च ४ करोड रुपैयाँ मात्र !
Classic Tech

चालु आर्थिक वर्ष २०७७।७८ को मध्यावधिसम्ममा सञ्चार तथा सूचना प्रविधि मन्त्रालयको पूँजीगत खर्च निराशाजनक देखिएको छ।

सञ्चार तथा सूचना प्रविधि मन्त्रालयको पूँजीगत खर्चको अवस्था समग्र मन्त्रालयहरु मध्ये सबैभन्दा कमजोर र न्यून रहेको देखिएको हो ।

चालु आर्थिक वर्षको अर्धवार्षिक समीक्षाको अवधिसम्म सञ्चार तथा सूचना प्रविधि मन्त्रालयको पूँजीगत (विकास) खर्च १.९९ प्रतिशत मात्र गर्न सकेको छ । आब २०७७/७८ का लागि सञ्चार तथा सूचना प्रविधि मन्त्रालयका लागि एक अर्ब ८४ करोड रुपैयाँ पूँजीगत बजेट छुट्याइएको थियो ।

त्यसमा मन्त्रालयले हालसम्म जम्मा ४ करोड रुपैयाँ मात्र खर्च गर्न सकेको हो । अघिल्लो वर्षको सोहि अवधिमा मन्त्रालयले ३७ करोड रुपैयाँ खर्च गरेको थियो । गत वर्षको तुलनामा यो वर्ष पूँजीगत खर्चको दरमा ९० प्रतिशतले कमी आएको छ ।

मन्त्रालयका लागि यो वर्ष चालु र पूँजीगत खर्चसहित कुल सात अर्ब २८ करोड रुपैयाँ बजेट विनियोजन भएको छ । जसमा २ अर्ब ६ करोड रुपैयाँ अर्थात २८.२८ प्रतिशत खर्च भएको छ। पूँजीगत खर्च जम्मा ४ करोड गर्न सकेको मन्त्रालयले चालु खर्च २ अर्ब २ करोड रुपैयाँ गरेको छ ।

सरकारी कर्मचारीको तलबभत्ता, भाडा, अनुदान, संघसंस्थालाई सहयोगदेखि उच्चपदस्थको भ्रमण र चियानास्ता सम्ममा हुने खर्चलाई चालु खर्चमा आउने गर्दछ ।

त्यसैगरि विकास निर्माणका कार्यहरु पूँजीगत खर्चअन्तरगत आउने गर्दछ ।

मन्त्रालयसँग डिजिटल नेपाल कार्यान्वयनको जिम्मेबारीका साथै नेपालको आफ्नै स्याटेलाइट प्रक्षेपण, सेक्यूरिटी प्रिन्टिङ्ग प्रेस स्थापनासहित सूचना तथा सञ्चार क्षेत्रको विकासको कार्यभार रहेको छ।

यो पनि हेर्नुस्-

नागरिक एप चलाउँदा डाटा शुल्क नलाग्ने बनाईँदै, सञ्चार मन्त्रालयको नियमनकारीलाई निर्देशन

TK Viber

प्रकाशित: १२ माघ २०७७, सोमबार

Loading...