अनलाईन लाइसेन्सको आवेदन बिहीबारदेखि इच्छुक सबैले भर्न सकिने

Technology Khabar २७ पुष २०७७, सोमबार

अनलाईन लाइसेन्सको आवेदन बिहीबारदेखि इच्छुक सबैले भर्न सकिने
Classic Tech

सवारी चालक अनुमतिपत्र (लाइसेन्स)को अनलाईन आवेदन ‘अनलिमिटेड’ बनाईने छ । यहि बिहीबारदेखि लाइसेन्सको अनलाइन आवेदन अनलिमिटेड बनाउने तयारी गरिएको यातायात व्यवस्था विभागका महानिर्देशक गोगनबहादुर हमालले जानकारी दिए ।

अहिले अनलाईन लाइसेन्स प्रणालीमा कोटा सिस्टम लागू हुँदा एक दिनमा निश्चित संख्यामा मात्र आवदेन दिन सकिन्छ । सिमित कोटा फुल हुँदा सिस्टम इररले भर्न नपाएको गुनासो बढेपछि विभागले अनलिमिटेड बनाउन लागेको जनाएको हो ।

‘हामी सिस्टमलाई परिस्कृत गर्दैछौं । सम्भवत बिहीबारसम्ममा अनलाईनमा अनलिमिटेड आवेदन लिन सुरु हुन्छ । अब अनलाईन आवेदनका लागि दैनिक कोटा हुँदैन । योग्यता पुगेका सबैले अनलाईन आवेदन दिन सक्छन् । सिस्टमले सबैको आवेदन लिन्छ,’ हमालले टेक्नोलोजीखबरसँग भने ।

तर लिखित परीक्षा र ट्रायल कार्यालयहरुले क्षमता अनुसार बिस्तारै लिँदै जानेछन् । अनलाईन आवेदन फारम भरेपछि सिस्टमले नै राजश्व तिर्नका लागि कार्यालय जाने मिती उपलब्ध गराउनेछ।

अहिले विद्यमान सिस्टमले कोटा अनुसार मात्रै आवेदन लिन्छ । यो सिस्टमका कारण धेरै जना अनलाईन आवेदन दिनबाट बञ्चित भइरहेका छन् । बिहीबारदेखि विभागको अनलाईन सिस्टममा फारम भर्ने वित्तिकै आवेदन स्विकार गर्नेछ । अनलाईन सिस्टमले आवेदनकर्तालाई राजश्व तिर्ने मिती तय गरिदिन्छ । तोकिएको दिनमा अनलाईन आवेदन दिएको कार्यालयमा गएर राजश्व तिर्नुपर्ने हुन्छ ।

राजश्व तिरेपछि यातायात कार्यालयले लिखित परीक्षाको मिति तोकिदिन्छ । लिखित परीक्षा दिएपछि आवेदकले ट्रायलका लागि समय पाउँछन् । अब भने अनलाइन आवेदन दिएका सुरुका आवेदकबाट कार्यालयको क्षमता अनुसार लिखित र ट्रायल परिक्षा संचालन गर्दै जाने योजना रहेको छ ।

‘लाइसेन्सका लागि दैनिक हजारौं जनाले विभागको वेबसाइट खोल्ने गरेका छन् । कार्यालयको क्षमता सिमित छ । धेरैले फारम भर्न नै नपाएको गुनासो गरे,’ हमालले भने, ’अब सबै आवेदन लिने हो । तर क्षमता तथा कोटा अनुसार मिति तोकिन्छ ।’

गत चैत ११ बाट सरकारले लकडाउन जारी गरेदेखि लाइसेन्सको ट्रायल पनि रोकिएको थियो । बीचमा कर, नवीकरण र नामसारी लगायतको सेवा खुले पनि नयाँ लाइसेन्स लिन चाहनेका लागि सेवा बन्द थियो । सबै क्षेत्र खुलको भन्दै चौतर्फी रूपमा खोल्न दबाब आएपछि स्वास्थ्य मन्त्रालयले जारी गरेको मापदण्ड पूरा गरेर पुस १४ गतेदेखि खुलाउने निर्णय भयो ।

उपत्यकामा भक्तपुरको जगाती, काठमाडौंको ठूलो भर्याङ, सुकेधारा, ललितपुरको एकान्तकुना गरि चारवटा कार्यालयबाट लाइसेन्सको परीक्षा सञ्चालन हुन्छ । ती कार्यालयहरुमा मोटरसाकल र स्कुटरका लागि तीन सय तथा कार र जीपका लागि दुई सय जनाको कोटा छुट्याइएको थियो । सोही कारण धेरैले आवेदन दिन नपाएका हुन् ।

TK Viber

प्रकाशित: २७ पुष २०७७, सोमबार

Loading...