रिचार्ज कार्डमा मनपरी मूल्य, १०० पर्ने कार्ड बेच्दा १२० रुपैयाँ असुली

Technology Khabar १८ पुष २०७७, शनिबार

रिचार्ज कार्डमा मनपरी मूल्य, १०० पर्ने कार्ड बेच्दा १२० रुपैयाँ असुली
Classic Tech
Nepal Telecom

डोटी जिल्लाका ग्रामीण भेगमा नेपाल टेलिकम र निजी क्षेत्रको कम्पनी एनसेलका प्रिपेड रिर्चाज कार्डमा मनपरी मूल्य लिने कार्य अझै रोकिएको छैन ।

हालसम्म सम्बन्धित निकायले समेत कुनै सुनुवाइ नगरेको सेवाग्राहीका गुनासो छ ।

डोटीका गाउँघरका व्यापारीले मनपरी मूल्य लिँदा ग्राहक ठगिँदै आएको दिपायल सिलगढी नगरपालिका–१ का भीमबहादुर साउँदले जानकारी दिए । उनले भने, ‘गाउँमा व्यापारीले रिचार्ज कार्डमा मनपरी मूल्य लिँदा ग्राहक ठगिँदै आएका छन् । सम्बन्धित निकाय मौन बसेका छन् ।’

जिल्ला सदरमुकामभन्दा बाहिर रहेका सबैजसो ग्रामीण भेगहरूमा व्यापारीले रिचार्ज कार्डमा उल्लेखित अधिकतम खुद्रा मूल्यभन्दा १० देखि २० रुपैयाँसम्म बढी लिने गरेको प्रयोगकर्ता (ग्राहक) को गुनासो छ ।

डोटीका गाउँमा व्यापारीले १०० रुपैयाँको रिचार्ज कार्डको १२० रुपैयाँ र ५० रुपैयाँको कार्डमा ६० रुपैयाँ लिने गरेको स्थानीयको आरोप छ । जिल्लाको बोगटान फुड्सिल, जोरायल, पूर्वीचौंकी, सायल, आदर्श, बडिकेदार गाउँपालिका लगायतका सडक यातायातको सुविधा पुगेका क्षेत्रमा पनि अधिकतम खुद्रा मूल्यभन्दा बढी रुपैयाँ लिने गरेको जनाइएको छ ।

नेपाल टेलिकमले कुनै चासो नदिँदा समस्या जस्ताको तस्तै रहेको जोरायल–५ का नीरज विष्टको भनाइ छ । कार्डहरूमा अधिकतम खुद्रा मूल्य प्रष्ट उल्लेख गरेको भए पनि व्यापारीले उक्त कुराको बेवास्ता गर्दै नियम विपरीत ग्राहकसँग बढी रकम असुल्ने गरेको उनको भनाइ छ ।

गाउँमा रिचार्ज कार्ड बिक्री गर्ने ग्राहकलाई रिचार्ज कार्डमा उल्लेख भएको मूल्यमा छुटदिइने भएकाले उनीहरुले गाउँमा बिक्री गर्दा जति रकमको रिचार्ज हो त्यत्ति रकम मात्रै लिनुपर्ने दिपायल पिपल्ला बजारमा नेपाल टेलिकम तथा एनसेलका रिचार्ज कार्ड थोकमा बिक्री वितरण गर्दै आएका डिलर व्यापारी किरण भण्डारीले जानकारी दिए ।

उनले भने, ‘हामीले गाउँका व्यापारीलाई कार्ड बिक्री गर्दा छुट दिएका हुन्छौं, उहाँहरूले तोकिएको मूल्यमा ग्राहकसँग कार्ड बेचे कुनै घाटा हुँदैन ।’

नेपाल टेलिकम दिपायल राजपरका सूचना अधिकारी प्रकाशबहादुर चौधरीले गाउँमा टेलिकमका कार्डमा तोकिएकोभन्दा बढी मूल्य लिएको विषयमा अनुगमन गरिने तयारी भइरहेको जानकारी दिए ।

‘कार्डमा बढी मूल्य लिइँदैछ भन्ने सुन्नमा आएको छ, हामी खास कुरो केहो छानबिन गर्ने तयारीमा छौं, गलत देखिए कारवाही हुन्छ,’ उनले भने ।

नेपाल टेलिकम व्यापार शाखा अत्तरियाका मगेन्द्र चौधरीले कार्डमा तोकिएकोभन्दा बढी मूल्य लिने गरेको गुनासो आएपछि टेलिकमबाट छानबिनका लागि कर्मचारी खटिएको बताए ।

TK Viber

प्रकाशित: १८ पुष २०७७, शनिबार

Loading...