Technology Khabar ७ पुष २०७७, मंगलवार
काठमाडौं ।
डिश मिडिया नेटवर्क लिमिटेड (डिशहोम फाइबरनेट)लाई प्रतिस्पर्धा विरोधी काम गरेको भन्दै नेपाल दूरसञ्चार प्राधिकरणले स्पष्टिकरण माग गरेको छ।
इन्टरनेट सेवा प्रदायक कम्पनीसमेत रहेको डिशहोमले अर्को प्रतिस्पर्धी कम्पनीको नामै तोकेर आफ्नो सेवाको विज्ञापन गरेपछिप्राधिकरणले स्पष्टिकरण सोधेको हो ।
डिशहोमले प्रतिस्पर्धी कम्पनी वर्ल्डलिंक कम्युनिकेसन्स लिमिटेडको नाम नै तोकेर सो कम्पनीको विरुद्धमा आफ्नो सेवाको विज्ञापन गरेको उजुरी आएपछि स्पष्टिकरण सोधेको प्राधिकरणका निर्देशक विजयकुमार रोयले बताए ।
उनले डिशहोमले प्रतिस्पर्धा विपरितको कार्य गरेको र अनैतिक कार्य गरेको भेटिएको बताए ।
‘वर्ल्डलिंकको नामै तोकेर डिशहोमले सो कम्पनीको सेवा छाड्ने ग्राहकलाई सित्तैमा इन्टरनेट सेवा दिने भनी विज्ञापन गरेको पाइएको छ, हामीलाई यस बारेमा उजुरी समेत आएपछि स्पष्टिकरणको पत्र काटेका हौं,’ रोयले भने ।
चित्तबुझ्दो जवाफ नआएमा थप कारबाही गर्ने उनले जानकारी दिए । त्यसैगरि डिशहोमलाई त्यस्तो विज्ञापन तत्कालै रोक्न निर्देशन दिएको बताए ।
डिशहोमले हाल उपत्यकाका विभिन्न स्थानहरुमा डिशहोम फाइबरनेट नाममा इन्टरनेट सेवा उपलब्ध गराउँदै आएको छ।
प्रकाशित: ७ पुष २०७७, मंगलवार
