दूरसञ्चार सेवा प्रदायकहरुलाई कागजात धुल्याउने बाटो खुल्यो, डिजिटल प्रति अनिवार्य राख्नुपर्ने

Technology Khabar ४ कार्तिक २०७७, मंगलवार

दूरसञ्चार सेवा प्रदायकहरुलाई कागजात धुल्याउने बाटो खुल्यो, डिजिटल प्रति अनिवार्य राख्नुपर्ने
फाइल फोटो
Classic Tech
Nepal Telecom

दूरसञ्चार तथा इन्टरनेट सेवा प्रदायक कम्पनीले आफ्ना ग्राहकहरुलाई सेवा दिएको बखतका पुराना कागजातहरु धुल्याउन सक्ने भएका छन् । त्यस्तो कागजातको डिजिटल प्रति राखेर कागजात धुल्याउन सक्नेगरी नयाँ विनियमावली आएको छ ।

नयाँ विनियमावलीसँगै ग्राहकसँग सम्बन्धित पुराना कागजात धुल्याउने बाटो खुलेको हो ।

नेपाल दूरसञ्चार प्राधिकरणले हालै कार्यान्वयनमा ल्याएको ‘दूरसञ्चार सेवा प्रदायकले सङ्कलन गरेको ग्राहकको फारामलगायतका कागजात धुल्याउने विनियमावली, २०७७’ ले कागजात धुल्याउन सकिने व्यवस्था गरेको हो ।

प्राधिकरण बोर्ड बैठकबाट गत असोज २३ गते पारित सो विनियमावलीले डिजिटल प्रणालीमा प्रविष्ट ग्राहकसँग सम्बन्धित पुराना कागजात तथा फाराम धुल्याउन सक्ने व्यवस्था गरेको छ ।

विनियमावली अनुसार सेवा प्रदायकहरूले धुल्याउन सकिने किसिमका कागजातहरुको सूची पनि समेत तोकेछ । जसमा सिम वितरण गर्दा ग्राहकले भरेको फाराम, ग्राहकको फोटोको प्रति, नागरिकता, राहदानी र परिचय खुल्ने अन्य कागजातको प्रतिलिपि, केवाईसी फाराम र सेवा प्रदायकले भराएको अन्य कुनै फाराम नष्ट गर्न वा धुल्याउन सक्ने व्यवस्था छ ।

यसरी धुल्याउँदा धुल्याउने दिन निश्चित गरी कुन मितिदेखि कुन मितिसम्म र कुन विषयको कागजात धुल्याउने हो ति सबै कागजातको अभिलेख खडा गर्नुपर्ने प्रावधान राखिएको छ ।

त्यस्तै धुल्याउने दिन धुल्याउन खडा गरिएको डिजिटल प्रतिअनुसार कागजात छ वा छैन, ती कागजात धुल्याउन सकिने हो वा होइन, यकिन गरी रजिस्टरमा सम्बन्धित प्रतिनिधिका सदस्यले दस्तखत गरेर मात्र धुल्याउनुपर्ने छ । कागजात धुल्याउने काम सकिएपछि धुल्याइएका कागजातको रजिस्टर प्रमाणित गरी सुरक्षित राख्नुपर्ने छ भने धुल्याइसकेका कागजातको डिजिटल प्रति माथिल्लो निकायले मागेको बखत जुनसुकै समयमा उपलब्ध गराउन सक्ने ढाँचामा पनि राख्नुपर्ने छ ।

यस्ता कागजात अनिवार्य रूपमा डिजिटल माध्यममा रेकर्ड गरेर सुरक्षित गरेर मात्र धुल्याउन अनिवार्य गरिएको छ ।

त्यसैगरि धुल्याउने कार्यका लागि प्राधिकरणले निर्देशन दिन सक्ने प्रावधान राखिएको छ भने मागेको बेलामा धुल्याईएका कागजातको डिजिटल कपी उपलब्ध गराउनुपर्नेछ।

तर सो विनियमावलीमा कति अवधि वा कति समयको कागजातलाई धुल्याउन सकिने भन्ने कुनै स्पष्ट उल्लेख गरिएको छैन् ।

Customer-form-and-other-customr-related-documet-disposal-Bylaws-2077
TK Viber

प्रकाशित: ४ कार्तिक २०७७, मंगलवार

Comments are closed.

Loading...