पोखरा महानगरले अनलाइनमार्फत कृषकहरुको तथ्यांक राख्दै वर्गीकरण गर्ने

Technology Khabar १३ आश्विन २०७७, मंगलवार

पोखरा महानगरले अनलाइनमार्फत कृषकहरुको तथ्यांक राख्दै वर्गीकरण गर्ने
Classic Tech

पोखरा महानगरपालिकाले अनलाइनमार्फत कृषकको वर्गीकरण गर्ने भएको छ ।

महानगरमा भित्रका कृषकलाई परिचयपत्र वितरण गर्नका लागि अनलाइनमार्फत आवेदन लिन सक्ने गरी वर्गीकरणको प्रक्रिया अगाडि बढाइएको महानगरपालिका कृषि तथा पशु विकास महाशाखा प्रमुख मनहर कडरियाले जानकारी दिए ।

कडरियाका अनुसार महानगरले तयार पारेको वेबसाइट https://apms.pokharakrishi.com मा राखिएको अनलाइन दर्ता फारम भरेर कृषक सूचीकृत हुन सक्नेछन् । कृषकले सबै विवरण घरमै बसेर मोबाइलबाटै पनि भर्न मिल्ने गरी व्यवस्था मिलाइएको छ ।

सो वेबसाइटमा रहेको फारममा कृषकको सम्पूर्ण विवरण भरेर पेश गरेपछि उक्त विवरणकै पहिचान गर्न सहज हुने उनको भनाइ छ । कोरोना भाइरसको महामारीका बेला कार्यालयमा भीडभाड गर्नुभन्दा अनलाइनबाट काम गर्दा छरितो हुने विश्वास गरिएको छ ।

कृषि क्षेत्रमा संलग्न कृषकलाई संलग्न तालिकामा दिइएअनुसारको विवरण अनलाइनबाट भर्न कृषकलाई अनुरोध गरिएको छ ।

कृषकले पेश गरेको विवरण सम्बन्धित वडाले रुजु गरी सिफारिसका साथ महानगर कृषि तथा पशु विकास महाशाखामा पठाउने र सम्बन्धित किसानले परिचयपत्र नं र वर्गीकरण सहितको कार्ड प्राप्त गर्नेछन् ।

उक्त कार्यविधिमा केही परिवर्तन भएकाले विगतमा कार्ड लिएका कृषकले पनि पुनः फर्म भर्न उनको आग्रह छ ।

महानगरप्रमुख मानबहादुर जिसीले स्मार्ट महानगरको अवधारणासहित अघि बढेको जनाउँदै प्रविधिको प्रयोग गरेर कृषिमा थप जागरण ल्याउन र वास्तविक कृषकको पहिचान गर्न अनलाइन प्रविधिमा जोड दिएको बताए ।

कृषि क्षेत्रको समग्र विकासका लागि स्रोत साधनको न्यायोचित र प्रभावकारी व्यवस्थापन गरी वास्तविक कृषक लाभान्वित हुने सुनिश्चितता कायम गर्न यो प्रणाली महत्वपूर्ण रहने उनको विश्वास छ ।

तपाईँपनि पोखरा महानगरमा भित्रको कृषक हुनुहुन्छ भने यस लिंकमा क्लिक गरेर सिधै फाराम भर्न सक्नहुनेछ ।

प्रकाशित: १३ आश्विन २०७७, मंगलवार

Comments are closed.

Loading...