इन्टरनेट सेवा प्रदायक कम्पनीहरुको नेतृत्वमा पूर्वाधार कम्पनी ल्याउने अन्तिम तयारी

Technology Khabar २५ भाद्र २०७७, बिहीबार

इन्टरनेट सेवा प्रदायक कम्पनीहरुको नेतृत्वमा पूर्वाधार कम्पनी ल्याउने अन्तिम तयारी
Classic Tech

अनुज राज

नेपालका इन्टरनेट सेवा प्रदायक कम्पनीहरु मिलेर नयाँ पूर्वाधार कम्पनी ल्याउने तयारी गरिरहेका छन् ।

नेपाल दूरसञ्चार प्राधिकरणले दूरसञ्चार पूर्वाधारको लागि इन्फ्रास्ट्रक्चर(पूर्वाधार) कम्पनीको लागि नियम जारी गरेसँगै नेपालमा पूर्वाधार कम्पनीको तयारी गरिएको थियो । तर अझैसम्म पूर्वाधार कम्पनी आउने अवस्था देखिएको छैन् ।

इन्टरनेट सेवा प्रदायक कम्पनीहरुको संस्था इन्टरनेट सेवा प्रदायक संघ नेपाल(आइस्पान)का अध्यक्षले भने पूर्वाधार कम्पनी ल्याउने बारेमा कुरा भईरहेको जानकारी दिए ।

उनले नेपाल आर्थिक पत्रकार समाज (सेजन) नेपालले आयोजना गरेको भर्चुअल अन्तरक्रियामा आइस्पानअन्तरगतका कम्पनीहरु मिलेर पूर्वाधार कम्पनी ल्याउने तयारी भएको खुलासा गरेका हुन् ।

यसअघि पनि पटक पटक इन्टरनेट सेवा प्रदायकहरु (आईएसपी) बिच पूर्वाधार कम्पनीको बारेमा कुराकानी भएपनि त्यस बारेमा काम भने अगाडि बढ्न सकेको थिएन् ।

विशेषगरि आइस्पानका सदस्यहरुमात्रै मिलेर पूर्वाधार कम्पनी खडा गर्ने बारेमा बृहतरुपमा २ पटक छलफल भईसकेको स्रोतले जानकारी दिएको छ । तर सो बारेमा अझै ठोस निर्णय हुन सकेको थिएन् ।

यसअघि गत फागुनमा नै नेपाल दूरसञ्चार प्राधिकरणका अध्यक्षको नेतृत्वमा आइस्पानका सदस्यहरुबिच प्राधिकरणमा नै पहिलो चरणको छलफल भएको थियो । जसमा आइस्पानका सदस्यहरुको लगानीमा पूर्वाधार कम्पनी ल्याउने निर्णय गरिएको थियो ।

‘तर त्यसपछिको छलफलमा कुन कम्पनीले कति शेयर लिने भन्ने बारेमा सहमत हुन नसक्दा पूर्वाधार कम्पनी तुहिएको थियो,’ सो छलफलको बारेमा जानकार स्रोतले टेक्नोलोजीखबरसँग भन्यो ।

स्रोतकाअनुसार विशेषगरि नेपालको सबैभन्दा ठूलो नेटवर्क भएको सेवा प्रदायक वर्ल्डलिंकलाई कति प्रतिशत शेयर हिस्सा दिने भन्ने बारेमा सहमत हुन नसक्दा र आइस्पान भन्दा बाहिरका कम्पनीहरुलाई सहभागी गराउने वा नगराउने भन्ने बारेमा सहमत हुन सकेको थिएन।

सो प्रारम्भिक छलफलमा विशेषगरि वर्ल्डलिंकका प्रतिनिधि, भायनेट, सुबिसु र क्लासिक टेकका प्रतिनिधिहरु सहभागी भएर छलफल गरेका थिए ।

त्यसपछि सोहि विषयमा आइस्पानभित्र पनि निकै छलफल भएपनि अन्त्यमा वर्ल्डलिंकलाई दिने शेयर हिस्सामा नै सहमति हुन सकेको थिएन् ।

छलफलमा सहभागी कम्पनीमध्येका एक कम्पनीका प्रतिनिधिले सो विषयमा आइस्पानका सदस्यहरुबिच नै तिब्र प्रतिस्पर्धाको अवस्था र खुट्टा तानातानको अवस्था भएको हुँदा पूर्वाधारमा सहमति नभएको बताए ।

‘एउटै कम्पनीलाई मात्र धेरै शेयर दिने की नदिने भन्ने विषयमा विवाद भयो र पूर्वाधार कम्पनीको बारेको छलफल त्यसै रोकियो,’ स्रोतले दाबी गर्यो ।

ठूला आइएसपीमध्येको एक कम्पनीका प्रतिनिधिले भने सबैलाई मिलाएर लानुपर्ने हुँदा एउटै कम्पनीलाई ठूलो शेयर दिन नहुने केहि समयअघि बताएका थिए ।

‘पूर्वाधार भनेको ठूलो कम्पनी हो यसमा सबैको स्वामित्व र अपनत्व गराउनुपर्दछ, एउटैलाई मात्र धेरै शेयर दिनुहुँदैन्,’ उनले भनेका थिए ।

पहिलो छलफलपछि देशभर लकडाउन भएसँगै सो विषय प्राथमिकतामा परेन र आधारभूत पूर्वाधार व्यवस्थापनमा नै सबैको ध्यान गएको थियो ।

तर फेरी पूर्वाधार कम्पनी गठन गर्ने बारेमा पुन आइस्पानहरुबिच नयाँ ढंगबाट छलफल गर्न शुरु भएको स्रोतले जानकारी दिएको छ ।

‘भदौको पहिलो सातामा भएको छलफलमा आइस्पानका सबै सदस्यहरुबिच छलफल भएको र सो मिटिङ्गमा दूरसञ्चार प्राधिकरणका अध्यक्षसमेत सहभागी रहेको स्रोतको दाबी छ ।

सो बैठकमा जसरी पनि इन्टरनेट सेवा प्रदायक कम्पनीहरुको सहभागीतामा नै पूर्वाधार कम्पनी ल्याईनुपर्ने बारेमा विशेष जोड दिईएको थियो ।

‘यदि स्थानिय आइएसपीहरु मिलेर पूर्वाधार कम्पनी नल्याएको खण्डमा भविश्यमा विदेशी कम्पनी आउनसक्ने तर्फ सबैलाई सचेत गराईएको र पुन नयाँ ढंगले शेयरमा संरचनामा सहमति भएको छ,’ स्रोतले दाबी गर्यो ।

आइस्पानका अध्यक्ष भट्टले पूर्वाधार कम्पनी ल्याउने सहमति भएको पुष्टी गर्दै अब मिलेर नयाँ संरचनामा पूर्वाधार कम्पनी ल्याउने कार्य भईरहेको र त्यसमा धेरै सहमति भईसकेको बताए ।

‘पूर्वाधार ल्याउन त्यति सजिलो छैन तर अब अन्तिम चरणमा सबैको सहमति भईसकेको छ र काम अगाडि बढेको छ,’ अध्यक्ष भट्टले टेक्नोलोजीखबरसँग भने ।

उनले प्राधिकरणको साथ र सहयोगमा नै पूर्वाधार कम्पनी ल्याउन काम भएको भन्दै त्यसमा लगभग सबैजनाको शेयर संरचना बारेमा पनि सहमत भएको बताए ।

‘हामीलाई प्राधिकरण र अध्यक्ष ज्यूको समेत सहयोग र समर्थन भएको हुँदा छिटोभन्दा छिटो पूर्वाधार कम्पनी ल्याउने योजनामा छौं,’ भट्टले भने ।

उनकाअनुसार केहि समयपछि नै पूर्वाधार कम्पनी ल्याउने योजना छ।

पूर्वाधार कम्पनीले अहिलेको इन्टरनेट पूर्वाधार र तार व्यवस्थापनलगायतको सम्पूर्ण कार्य गर्नेछ भने संचालनमा रहेका सबै इन्टरनेट सेवा प्रदायकहरुलाई सेवा उपलब्ध गराउने उनको भनाई छ ।

प्रकाशित: २५ भाद्र २०७७, बिहीबार

Leave a Reply

Loading...