जब नियमनकारी निकाय दूरसञ्चार प्राधिकरण नै वर्ल्डलिंकलाई कारबाही गर्नबाट डरायो

Technology Khabar ८ श्रावण २०७७, बिहीबार

जब नियमनकारी निकाय दूरसञ्चार प्राधिकरण नै वर्ल्डलिंकलाई कारबाही गर्नबाट डरायो
Classic Tech

अनुज राज

गएको असार १७ गते नेपाल दूरसञ्चार प्राधिकरणमा एउटा फरक किसिमको उजुरी निवेदन दर्ता भयो । सो उजुरी निवेदन दर्ता गर्ने कुनै सेवाग्राही नभए एउटा इन्टरनेट सेवा प्रदायक कम्पनी थियो ।

प्राधिकरणमा आफूले सेवा नपाएको भन्दै उजुरी दिने इन्टरनेट सेवा प्रदायक(आईएसपी) कम्पनी थियो झापाको दमक नगरपालिकामा रहेको फस्टलिंक कम्युनिकेशन्स प्रालि । जसले दूरसञ्चार प्राधिकरणबाट इन्टरनेट(ईमेलसहित) सेवा प्रदान गर्ने र नेटवर्क सर्भिस प्रोभाइडरको अनुमति पत्र लिएको छ ।

कम्पनीले २०७४ साल जेठ ८ गते देखि प्राधिकरणबाट आईएसपीको अनुमति पत्र लिएको देखिन्छ भने गएको पुस २२ गते नेटवर्क सेवा प्रदायकको अनुमति पत्र लिएको देखिन्छ।

करिब ३ वर्षदेखि आईएसपीको रुपमा काम गरेर सेवा दिईरहेको फस्टलिंकले आफूले नै नेटवर्क सेवाको अनुमति पत्र लिन आवश्यक भएपछि अनुमति पत्र लिएको देखिन्छ ।

सो कम्पनीले नेपालको झापा, दमक लगायतको पूर्वी भागमा इन्टरनेट सेवा दिईरहेको छ । कम्पनीको वेबसाइटकाअनुसार कम्पनीले अप्टिकल फाइबरमा आधारित भएर सेवा दिईरहेको छ ।

बिगत ३ वर्षदेखि आईएसपीको काम गरिरहेको र करिब ६ महिनादेखि नेटवर्क सेवा प्रदायक समेत भएको कम्पनीले उजुरीमा आफूले नै सेवा नपाएको गुनासो गर्दै प्राधिकरणमा उजुरी दिएको थियो ।

असार १७ गते कम्पनीले आफूले अर्को नेटवर्क सेवा प्रदायक कम्पनीबाट इन्टरनेट लिईरहेको र त्यसको लागि सम्झौतासमेत गरेर रकम दिईसकेको तर इन्टरनेट सेवा काटिदिएको पत्रमा उल्लेख गरेको थियो ।

हामीले हेरेको र फस्टलिंकका संचालक तथा अध्यक्ष रमेश काफ्लेले दिएको उजुरीमा नेटवर्क सेवा प्रदायक कम्पनी वर्ल्डलिंक कम्युनिकेशन्स लिमिटेडले आफ्नो सम्झौताअनुसार इन्टरनेट नदिएर काटिदिएको उल्लेख छ ।

सो उजुरी पत्रमा वर्ल्डलिंकलाई कारबाही गरी सेवा सुचारु गरिदिन भन्दै प्राधिकरणसँग अनुरोध समेत गरिएको थियो ।

अझ त्यसमा इन्टरनेट सेवा प्रदायक कम्पनीहरुको संस्था आईस्पानले नै इन्टरनेट काट्न भनेको समेत उल्लेख गरिएको छ ।

सो पत्र आउने बित्तिकै प्राधिकरणमा हल्लिखल्लि मच्चिएको थियो । र त्यसमा तत्काल प्रकृया अगाडि बढाउनुपर्ने आवश्यक थियो । त्यसैले प्राधिकरणका सम्बन्धित अधिकारीहरुले सो बारेमा बुझ्नका लागि वर्ल्डलिंकका प्रतिनिधिलाई तत्काल बोलाएका थिए र फस्टलिंकका प्रतिनिधिसँग सम्पर्कमा राखेर कुरा भएको थियो ।

फस्टलिंकले उजुरी पत्रमा दाबी गरिएको विषय सत्य भएको ठहर भएको र वर्ल्डलिंकले समेत सो कुरा स्वीकार गरेको थियो ।

नेटवर्क सेवा प्रदायक कम्पनीको रुपमा वर्ल्डलिंकले फस्टलिंकलाई इन्टरनेट सेवा उपलब्ध गराउन सम्झौता गरिएको र अग्रिम रकम समेत भुक्तान गरिसकेकोमा कम्पनीले अचानक इन्टरनेट काट्नु सबैको लागि आश्चार्यको विषय थियो ।

जसमा फस्टलिंकले उजुरी गरेको थियो भने वर्ल्डलिंकले सो उजुरीको विषय स्वीकार समेत गरेको थियो ।

अझ वर्ल्डलिंकका प्रतिनिधिले त फस्टलिंकको इन्टरनेट अर्को नेटवर्क सेवा प्रदायक कम्पनीका संचालकले भनेर नै काटिदिएको समेत खुलासा गरेका थिए। र त्यसरी फस्टलिंकको इन्टरनेट काटिदिन वर्ल्डलिंकलाई आदेश दिने व्यक्ति कम्पनी नेटवर्क सेवा प्रदायक क्लासिक टेक प्रालिका संचालक थिए ।

उनले फोन गरेर नै वर्ल्डलिंकलाई फस्टलिंकको इन्टरनेट काटिदिन दबाब दिएका थिए भने अन्य कम्पनीलाई समेत सोहि ब्यहोराअनुसार इन्टरनेट नदिन दबाब दिएका थिए ।

उनले फस्टलिंकको भुक्तानी रकम बाँकी भएको हुँदा इन्टरनेट सेवा काटिदिन भनेको भन्दै कम्पनीले मौखिकरुपमा जानकारी दिएको थियो भने वर्ल्डलिंकका प्रतिनिधिले समेत सोहि अनुसार इन्टरनेट काटिएको बताएका थिए ।

सो उजुरीको सुनुवाई तत्काल गर्नुपर्ने भएपछि प्राधिकरणका अधिकारीहरुले यसलाई गंभिररुपमा लिएर दुबै पक्षलाई छलफलमा बोलाएका थिए र अधिकारीहरुले वर्ल्डलिंकलाई तत्काल इन्टरनेट जोड्न मौखिक आदेश दिएका थिए ।

सो आदेशपछि वर्ल्डलिंकले इन्टरनेट काटिएको करिब १९ घण्टापछि इन्टरनेट जोडिदिएको थियो ।

वर्ल्डलिंकले इन्टरनेट पुन जोडिदिएपछि फस्टलिंकले त्यसबारेमा फेरी अर्को पत्र पठाउँदै इन्टरनेट जोडिएको र सो उजुरीको पत्रलाई रोक्न अनुरोध गरेको थियो । कम्पनीले यस्तो पत्र असार २२ गते पठाएको थियो ।

सो पत्र पठाएसँगै यो विषय राफसाफ भएको भन्दै प्राधिकरणले थप कुनै प्रकृया अगाडि बढाएको छैन् ।

फस्टलिंकका अध्यक्ष काफ्लेले क्लासिस टेकले गुणस्तरीय सेवा नदिएपछि अग्रिम जानकारी दिएर नै सम्झौता खारेज गरेको जानकारी दिए ।

‘हाम्रो क्लासिक टेकसँग कुनै समस्या र बाँकी भुक्तानी थिएन्, उहाँहरुलाई पटक पटक भन्दा पनि सम्झौताअनुसारको गुणस्तरको इन्टरनेट नदिएको हुँदा वर्ल्डलिंकसँग गएका हौं, तर उहाँहरुले वर्ल्डलिंकलाई पनि इन्टरनेट काटिदिन दबाब दिनुभएछ,’ फस्टलिंकका अध्यक्ष काफ्लले भने ।

उनकाअनुसार यो व्यवसायीक रुपमा गलत भएको र आफ्ना ५ हजार भन्दा बढि ग्राहकहरु जसमा सरकारी निकायहरु, गाबिस कार्यालय, नगरपालिका, अस्पतालहरुको सेवा नै प्रभावित भएको थियो ।

‘हाम्रो इन्टरनेट सेवा लिएर अस्पतालले चलाएको टेलिमेडिसिन सेवा नै बन्द भयो, यसले हामीलाई पनि गंभिर नोक्सानी भएको छ,’ उनले भने ।

अहिले वर्ल्डलिंकले जोडिदिए पनि ठूला कम्पनीहरुले जे पनि गर्न सक्ने संभावना र उनीहरुप्रति विश्वास नभएको हुँदा नेपाल टेलिकमसँग पनि सेवा किनेको उनले बताए । वर्ल्डलिंकले पनि अर्को कम्पनीको संचालकले भनेको भरमा नै हाम्रो इन्टरनेट काट्न गलत भएको उनले स्पष्ट पारे ।

‘क्लासिक टेकले त हामीलाई बन्द नै गराउने चेतावनी दिनुभएको थियो र अन्य एनएसपीलाई पनि नेटवर्क नदिनु भनेर दबाब दिनुभएको रहेछ, त्यसैले वर्ल्डलिंकले हाम्रो इन्टरनेट गलत तरिकाले काटिदिएको थियो’ फस्टलिंकका अध्यक्ष काफ्लले भने ।

काफ्लेकाअनुसार इन्टरनेट काटिनु अगाडी नै कम्पनीले वर्ल्डलिंकसँग सम्झौता गरेको र अग्रिम रकम पनि भुक्तान गरिसकेको थियो ।

तर यस्तो निकै संवेदनशिल विषयमा इन्टरनेट काट्ने कम्पनी र काट्न आदेश दिने अर्को कम्पनीलाई कारबाही नगरिएको भन्दै प्राधिकरण भित्रै प्रश्न उब्जिएको छ ।

‘यस्तो गंभिर विषयमा अहिलेसम्म वर्ल्डलिंकलाई स्पष्टिकरणसमेत नसोधिनु र कारबाही नहुनु भनेको आश्चार्य हो । यसले आगामी दिनमा ठूला कम्पनीले नियामक निकायलाई नै नटेर्ने अवस्था आउन सक्नेछ,’ एक कर्मचारीले नाम उल्लेख नगर्ने शर्तमा भने ।

सो घट्नापछि फस्टलिंकले आफैंले विदेशबाट ब्याण्डविथ आयात गर्ने तयारी गरेको छ।

TK Viber

प्रकाशित: ८ श्रावण २०७७, बिहीबार

Loading...