समाचार र सूचना प्राप्त गर्न नेपालमा सामाजिक सञ्जालमध्ये फेसबुक सबैभन्दा लोकप्रिय

Technology Khabar ४ असार २०७७, बिहीबार

समाचार र सूचना प्राप्त गर्न नेपालमा सामाजिक सञ्जालमध्ये फेसबुक सबैभन्दा लोकप्रिय

नेपालमा समाचार हेर्न वा पढ्नको लागि सामाजिक संजालमा शेयर भएका जानकारी हेर्नेहरुको संख्या बढिरहेसँगै फेसबुकमार्फत समाचार हेर्नेहरु अधिक रहेको तथ्यांक सार्वजनिक भएको छ ।

प्रेस काउन्सिल नेपालले गरेको केहि साता अघि सार्वजनिक गरेको ‘कोरोना महामारीको समयमा मिडियोको विश्वसनीयता सम्बन्धी मिडिया सर्वेक्षण’ अनुसार नेपालमा समाचार थाहा पाउन सबैभन्दा धेरैले फेसबुक प्रयोग गर्ने गरिएको छ ।

सो मिडिया सर्वेक्षणले करिब ४९.४ प्रतिशत सहभागीहरुले सामाजिक संजालमा आएका सूचना र समाचारमूलक सामाग्रीहरु प्रति सामान्य विश्वास भएको बताएका छन भने ३०.७ प्रतिशतले न्यून विश्वास तथा १५.९ प्रतिशतले अति न्यून विश्वास भएको विचार व्यक्त गरेको देखाएको छ ।

त्यसैगरि सामाजिक संजालहरुमध्ये पनि सबैभन्दा धेरै फेसबुकको प्रयोग हुने गरेको देखिन्छ । अन्य सोशल मिडियामा ट्विटर, ह्वाट्सएप, यूट्यूब रहेको भएपनि त्यसको संख्या निकै न्यून छ । जसअनुसार फेसबुकमार्फत करिब ८०.७ प्रतिशत सर्वेक्षणमा सहभागीहरुले समाचार प्राप्त गर्ने गरेको देखिएको छ ।

प्रेस काउन्सिलको सो सर्वेक्षणमा ट्विटरको प्रयोग समाचार थाहा पाउनका लागि ८ प्रतिशतले मात्र प्रयोग गर्ने गरेका छन भने यूट्यूबमार्फत सूचना तथा जानकारी लिन ९.१० प्रतिशत र ह्वाट्सएपको संख्या २.३० प्रतिशत रहेको छ ।

प्रदेशको आधारमा हेर्दा प्रदेश नं. १ र गण्डकी प्रदेशका सहभागीहरुको बराबर संख्यामा सामाजिक संजालमा राखेका सामाग्रीहरुप्रति अधिक विश्वास र सामान्य विश्वास दुबै हुने खालको मिश्रित प्रतिकृया दिएको सर्वेमा उल्लेख छ । प्रदेश नं. ५ मा भने न्यून विश्वास भएको विचार व्यक्त गर्ने सहभागीहरु अधिक रहेको उल्लेख छ ।

सर्वेक्षण २०७६ चैत ११ गतेदेखि २०७७ वैशाख ३० गतेसम्मको लकडाउनको अवधिभर कोरोना विषयमा मिडियाहरुबाट भएका समाचार प्रवाहका विषयमा केन्द्रित रहेर गरिएको हो ।

जसमा ११ वटा प्रश्नहरु सबै प्रदेश र काठमाडौं उपत्यकाका १७६ सहभागीहरु रहेको र विभिन्न ११ पेसाका मानिसहरु सहभागी रहेको काउन्सिलले जानकारी दिएको छ ।

नेपालमा हाल २०६५ वटा अनलाइन दर्ता भएर संचालनमा छन् ।

प्रकाशित: ४ असार २०७७, बिहीबार

Comments are closed.

Loading...