डिपफेक प्रविधिद्धारा नेपाली कलाकारको ‘फेक’ अश्लिल भिडियो बनाएर धम्की दिँदै भारतीय ह्याकर

Technology Khabar १३ जेष्ठ २०७७, मंगलवार

डिपफेक प्रविधिद्धारा नेपाली कलाकारको ‘फेक’ अश्लिल भिडियो बनाएर धम्की दिँदै भारतीय ह्याकर

लिपुलेकसहितको नक्सा नेपालले सार्वजनिक गरेसँगै भारतीय ह्याकरहरुले शुरु गरेको ह्याकिङ्गको घट्ना अब नेपाली कलाकारहरुसम्म पुगेको छ ।

पछिल्लो दिनमा नेपाली ह्याकरहरुले पनि भारतका केहि वेबसाइटहरु ह्याक गरिदिएसँगै दुबै पक्षबिच ह्याकिङ्ग युद्धको अवस्था आएको छ । जसमा केहि दिनअघि मात्रै भारतीय ह्याकरले नेपाल नागरिक उड्डयन प्राधिकरणको आधिकारीक बेबसाइट ह्याक गरेका थिए ।

नेपाल र भारतका ह्याकरहरुको जुहारी बिच नागरिक उड्डयन प्राधिकरणको वेबसाइट ह्याक

तर अब भने भारतीय ह्याकरहरुले नेपाली नायिकाहरुलाई धम्की दिँदै उनीहरुको अश्लिल भिडियो सार्वजनिक गरिदिने चेतावनी दिएका छन् ।

यहि बेलामा भारतीय ह्याकरहरुले नेपाली चलचित्र कलाकार आँचल शर्माको डिप फेक प्रविधि दूरुपयोग गरेर तयार पारिएको नक्कली अश्लिल भिडियो बनाएर सार्वजनिक गरेको दाबी गरेका छन् ।

सो भिडियोलाई सक्कली जस्तै देखाउने प्रयास गरिएपनि त्यसमा डिपफेक प्रविधि प्रयोग गरिएको स्पष्ट देख्न सकिन्छ ।

यसलाई नेपाली एक ह्याकरले समेत ट्विटरबाट प्रस्ट पारेका छन् ।

आँचल शर्मा मात्र नभई नेपाली कलाकारहरु नम्रता श्रेष्ठ र साम्राज्ञी राज्यलक्ष्मी शाहको अनुहार राखेर डिप फेक प्रविधिमार्फत तयार पारिएको भिडियो बनाएको हामीले पत्ता लगाएका भिडियोहरु हेर्दा देखिन्छ ।

जसमा नम्रता र आँचल शर्माको भिडियो ८ महिना अगाडि नै तयार पारेर अपलोड गरिएको छ भने साम्राज्ञीको नाममा २ साता अगाडि मात्र भिडियो अपलोड गरिएको छ ।

भारतीय ह्याकरहरुको चेतावनीसँगै नेपाली कलाकारहरु भने चिन्तामा रहेको देखिन्छ ।

कलाकार आँचल शर्माले देशको बारेमा बोल्दा नेपाली चेलीले धम्की सहनुपर्ने भनेर आफ्नो फेसबुकमा लेखेकी छिन् । उनले अश्लिल भिडियो बनाएर मानसिक यातना दिने र चरित्र हत्या गर्नेका विरुद्धमा एक भएर लाग्नुपर्ने बताएकी छिन् ।

के हो डिप फेक प्रविधि ?

विभिन्न चर्चित मानिसहरुको भिडियोहरु बनाएर सामाजिक संजालमा हाल्ने वा चरित्र हत्या गर्ने उद्धेश्यले यस्तो डिप फेक भिडियोहरु बनाउने गरिन्छ ।

हेर्दा दूरुस्तै देखिने भएपनि त्यो उच्च प्रविधिमार्फत कम्प्यूटरमा तयार पारिएको हुन्छ । त्यस्ता भिडियोहरु तपाईँले चिनेका वा हेर्दै आएका भिडियो जस्तै हुन्छन तर ती सबै नक्कली हुन्छन् ।

पछिल्ला दिनमा नयाँ प्रविधिहरुको आविश्कार र प्रयोगले गर्दा यस्ता भिडियोहरु बनाईने गरेको छ ।

मेसिन लर्निङ्ग र आर्टिफिसियल इन्टेलिजेन्स(एआई)को संयोजनमा डिपफेक प्रविधिको विकास भएको हो । यसले सक्कली र वास्तविक तथा नक्कली कन्टेन्टको बीचको फरक छुट्याउन समस्या बनाईदिएको छ ।
यो प्रविधिले भिडियोका अनुहारमा जुनसुकै सेलेब्रेटी वा अन्य मानिसको अनुहारलाई दूरुस्तै मिलाई दिन्छ ।

त्यसैगरि डिपफेक प्रविधिमार्फत प्रयोगकर्ताले आफूले चाहेको मानिसको जस्तै आवाज बनाएर जुनसुकै बोल्ने गराउन सक्दछ ।

तर यसको दूरुपयोग गरेर विश्वभर चर्चित व्यक्तिहरु र कलाकारहरुको अश्लिल भिडियोहरु तयार पार्न थालेपछि यसको बारेमा चर्को आवाज उठिरहेको छ । डिपफेक प्रविधिको दूरुपयोग गरेर मार्क जूकरबर्ग र अमेरिकी राष्ट्रपति डोनाल्ड ट्रम्पको समेत डिपफेक भिडियो बनाईसकेका छन् ।

अहिले पनि यहि प्रविधिको दूरुपयोग गरेर नेपाली कलाकारहरुको अश्लिल भिडियो सार्वजनिक गरिएको हो । जसमा अन्य कलाकारहरुको नक्कली तस्वीर समेत राखिएको छ ।

*हेडलाइन सम्पादित

यो पनि हेर्नुस्-

आईफोन ह्याक गर्ने ‘जेलब्रेक टूल’ बनाए ह्याकरले, नयाँ आईओएस १३.५ पनि ह्याक गर्नसक्ने

प्रकाशित: १३ जेष्ठ २०७७, मंगलवार

Comments are closed.

Loading...