दूरसञ्चार सेवा प्रदायकहरुको वित्तीय प्रतिवेदनको अध्ययन गर्न परामर्शदाता मागियो

Technology Khabar २३ बैशाख २०७७, मंगलवार

दूरसञ्चार सेवा प्रदायकहरुको वित्तीय प्रतिवेदनको अध्ययन गर्न परामर्शदाता मागियो
फाइल फोटो
Classic Tech

नेपाल दूरसञ्चार प्राधिकरणले दूरसञ्चार सेवा प्रदायकहरुको वित्तीय प्रतिवेदनको अध्ययन गराउने भएको छ । प्राधिकरणले विभिन्न कम्पनीहरुको वित्तीय प्रतिवेदनको मापदण्ड र प्राधिकरणलाई दिएका बिबरणहरु ठिक भए नभएको जाँच गराउन लागेको हो ।

यसको लागि दूरसञ्चार प्राधिकरणले हालै परामर्शदाता नियुक्त गर्न प्रस्ताव माग गरेको छ।

सो प्रस्तावअनुसार परामर्शदाता कम्पनीले टेलिकम सेवा प्रदायकहरुको वित्तीय प्रतिवेदनहरु नियमनकारी तथ्यांकअनुसार भए नभएको प्रमाणित गर्नेछ । त्यस्तै आर्थिक वर्ष २०७५/७६ को विभिन्न सेवा प्रदायकहरुको आम्दानी, लागत, सम्पत्ति र दायित्वहरुको विश्लेषण समेत गर्नुपर्नेछ र एकान्टिङ्ग प्रणाली पारदर्शि भएको सुनिश्चित गराउनुपर्नेछ ।

परामर्शदाताले तोकिएका दूरसञ्चार सेवा प्रदायक कम्पनीहरुको वित्तीय बिबरणहरु संकलन र प्रमाणिकरण गर्नुपर्ने हुन्छ। त्यसैगरि कम्पनीहरुले प्राधिकरणमा बुझाएको वित्तीय प्रतिबेदनहरुको प्रमाणिकरण गर्नुका साथै उनीहरुले बुझाएको रोयल्टी रकम, ग्रामीण दूरसञ्चार विकास कोषको रकम लाइसेन्सको अनुमतिअनुसार भए नभएको हेर्नुपर्ने हुन्छ ।

परामर्शदाताले आफ्नो पूर्ण प्रतिबेदन ४ महिनाभित्र बुझाउनुपर्नेछ । यस कार्यको लागि प्राधिकरणले करिब २० लाख रुपैयाँ बजेट छुट्याएको छ ।

प्राधिकरणका प्रवक्ता मिनप्रसाद अर्यालले कम्पनीहरुको एकाउन्टिङ्ग फम्र्याटमा एकरुपता भए नभएको हेर्नका लागि परामर्शदाता नियुक्त गर्न लागिएको बताए ।

‘यसमा सरकारको अनुदानको उपयोग वा दूरुपयोग, कम्पनीहरुले दिईरहेको डाटा, भ्वाइस,लगायतको बिबरणहरु छुट्टाछुट्टै राखिएको छ वा छैन हेर्नेछन्,’ प्रवक्ता अर्यालले भने ।

TK Viber

प्रकाशित: २३ बैशाख २०७७, मंगलवार

Loading...