Technology Khabar १९ बैशाख २०७७, शुक्रबार
काठमाडौं ।
कोभिड-१९ ले विश्वभर आक्रान्त पारिरहेको बेला यसले स्मार्टफोन बजारमा पनि नराम्रो प्रभाव पारेको छ । हालै सार्वजनिक रिपोर्टअनुसार विश्वभर स्मार्टफोन बजारमा कमी आएको छ ।
काउन्टरप्वाइन्ट रिसर्चको विश्लेषणअनुसार सन् २०२० को पहिलो त्रैमासमा स्मार्टफोन आपूर्तिमा १३ प्रतिशतको कमी आएको छ । कोभिड-१९ का कारण वार्षिक वृद्धिदरको आधारमा १३ प्रतिशतले कमी आएको हो । सो अवधिमा ३० करोड भन्दा पनि कम मोबाइल मात्र आपूर्ति भएका थिए, जून तथ्यांक सन् २०१४ को बराबर हो ।
पहिलो त्रैमासमा सबै कम्पनीहरुको आपूर्ति प्रभावित भएपनि दुई स्मार्टफोन ब्राण्ड भने त्यसबाट बचेका छन् । ती कम्पनीहरु शाओमी र रियलमी हुन् ।
सबै कम्पनीहरुको वृद्धिदर नकारात्मक भएको बेलामा बजारमा सामसङ पहिलो स्थानमा नै छ भने त्यसपछि ह्वावे रहेको छ । टेक कम्पनी एप्पल तेस्रो स्थानमा छ भने अन्यमा चिनियाँ ब्राण्डहरुको बर्चश्व रहेको छ ।
काउन्टर प्वाइन्टकाअनुसार पहिलो त्रैमासमा २९ करोड ५० लाख यूनिट शिपमेन्ट भएको थियो त्यसमध्ये सामसङले ५ करोड ९० लाख यूनिटसहित २० प्रतिशत बजार हिस्सा बनाएको छ । त्यस्तै ह्वावेले सो अवधिमा ४ करोड ९०लाख यूनिट आपूर्ति गर्दै १७ प्रतिशत बजार हिस्सा लिएको छ भने एप्पलले ४ करोड यूनिटका साथमा १४ प्रतिशत बजार ओगटेको देखिन्छ ।
चिनियाँ ब्राण्ड शाओमीले भने २ करोड ९७ लाख यूनिट शिपमेन्ट गर्दै १० प्रतिशत बजार ओगटेको छ भने अर्को कमपनी रियलमीले ७२ लाख यूनिट शिपमेन्ट गर्दै २ प्रतिशत बजार लिएको छ । यी दुबै कम्पनीहरुको बजार हिस्सामा क्रमशः २ र १ प्रतिशतको वृद्धि भएको छ ।
ओपो र भीभोको बजार हिस्सा क्रमशः ८ र ७ प्रतिशत रहेको छ । अन्य प्रमुख १० कम्पनीमा लेनोभो ग्रुप, एलजी, टेक्नो लगायत छन् ।
रिसर्च संस्थाकाअनुसार आउँदो दोस्रो त्रैमासमा अहिलेको भन्दा झनै खराब अबस्था हुनेछ । चिनियाँ बजार यसअघि नै सुधारमा रहेको हुँदा त्यहाँ भने ह्वावे र ओपोको उपस्थिती राम्रो देखिनेछ ।
महामारीको भन्दा अगाडि न्यून आय भएका मानिसहरुले अफलाइनमा डिभाइस किन्ने गरेकोमा अब त्यो अवस्था सक्षम नहुँदा त्यसले इन्ट्रि लेभलको सेगमेन्टलाई ईमजिङ्ग देशहरुमा सबैभन्दा धेरै असर पार्ने रिपोर्टमा उल्लेख छ ।
मिडरेन्ज सेगमेन्टले बजारलाई अगाडि बढाउनेछ भने प्रिमियम सेगमेन्टमा प्रत्यक्ष प्रभाव पर्नेछैन् ।
प्रकाशित: १९ बैशाख २०७७, शुक्रबार