Technology Khabar २३ चैत्र २०७६, आईतवार
काठमाडौं ।
म्यूजिक स्ट्रिमिङ्ग व्यवसायलाई सन् २०१९ फलदायक भएको छ । सो वर्षमा समग्र म्यूजिक स्ट्रिमिङ्ग व्यवसाय ३२ प्रतिशतले वृद्धि भएको देखिएको छ । काउन्टरप्वाइन्टको रिसर्च रिपोर्टअनुसार सो वर्ष स्पोटीफाई र एप्पल म्यूजिक अग्रस्थानमा रहेका थिए ।
सन् २०१९ मा एप्पको म्यूजिक सब्सक्राइबरको संख्यामा ३६ प्रतिशत वृद्धि भएको देखिएको छ, जसले समग्र बजारमा १९ प्रतिशत हिस्सा ओगटेको रिपोर्टले देखाएको छ ।
स्पोटीफाईको सब्सक्राईबर नम्बरमा पनि वृद्धि भएको छ ।रिपोर्टकाअनुसार स्पोटीफाईका सेवाग्राही २३ प्रतिशत बढेका छन भने बजार हिस्सामा अग्रता लिँदै ३५ प्रतिशत ओगटेको छ । स्पोटीफाइले सो अवधिमा आम्दानीको आधारमा भने कुल उद्योगको ३२ प्रतिशत हिस्सा लिएकोछ ।
म्यूजिक स्ट्रिमिङ्ग व्यवसायको तेस्रो सूचीमा भने अमेजनको म्यूजिक स्ट्रिमिङ्ग सर्भिसले १५ प्रतिशत हिस्सा लिएको छ भने यूट्यूब म्यूजिकले केबल ६ प्रतिशत प्रिमियम सब्सक्राईबरमध्येको हिस्सा लिएको छ ।
मार्केट एनालाइसिस्टकाअनुसार एप्पलको म्यूजिक स्ट्रिमिङ्ग व्यवसायमा वृद्धि हुनुमा निरन्तर सर्भिसमा सुधार हुनु र स्पोटीफाईका सब्सक्राइबरलाई तान्नु हो । त्यसैगरि कम्पनीले एक्सक्लूसिभ कन्टेन्ट र प्रोमोसन डिलहरु निरन्तर उपलब्ध गराईरहँदा पनि ग्राहकहरुमा वृद्धि गर्न सफल भएको छ ।
काउन्टरप्वाइन्टकाअनुसार कोभिड १९ का कारण पनि सन् २०२० मा म्यूजिक स्ट्रिमिङ्ग व्यवसायको माग बढ्नेछ र २५ प्रतिशतले सब्सक्राइबरहरु वृद्धि हुनेछन् । हाल विश्वभर म्यूजिक स्ट्रिमिङ्ग सर्भिसका सशुल्क सेवाग्राहीहरु ४५ करोड भन्दा बढि पुगेका छन् ।
रिसर्च कम्पनीकाअनुसार ग्लोबल र रिजनल म्यूजिक स्ट्रिमिङ्ग सर्भिसहरुले एक्सक्लुसिभ कन्टेन्टमा जोड दिएका छन् । त्यसैगरि कुल आम्दानीको ८० प्रतिशत रकम सशुल्क सब्सक्रिप्सनबाट आउने गरेको छ भने बाँकी विज्ञापन र अन्य गतिबिधिबाट आउने गरेकोछ ।
प्रकाशित: २३ चैत्र २०७६, आईतवार