Technology Khabar ११ चैत्र २०७६, मंगलवार
काठमाडौं ।
कोरोनाभाइरस फैलनबाट रोक्न सरकारले ‘लकडाउन’ गरेसँगै मानिसहरु घरमा नै बसेर इन्टरनेट सेवाको प्रयोग गरिरहेका छन् । जसले गर्दा इन्टरनेट ब्याण्डविथ खपत र नेटवर्क ट्राफिक निकै बढेको छ ।
सामाजिक संजालहरुमा पनि इन्टरनेट स्लो भएको जस्ता गुनासाहरु आउन थालिसकेका छन् । दूरसंचार सेवालाई सरकारले अत्यावश्यक सेवाअन्तरगत राखेको छ भने इन्टरनेट पनि अत्यावश्यक सेवाअन्तरगत पर्दछ ।
मानिसहरु घरमा बढि इन्टरनेट प्रयोग गरिरहेको बेलामा इन्टरनेट सेवा प्रदायकहरुले आफ्नो सेवालाई चुस्त दुरुस्त पार्न र इन्टरनेट सेवा ग्राहकहरुलाई उपलब्ध गराउन नेटवर्कको मर्मत नियमितरुपमा गरिरहेका छन् ।
अपडेट (२०७६ चैत १४ गते)
हाल इन्टरनेट सेवा प्रदायकहरुको गाडीलाई प्रशासनले पास उपलब्ध गराएको तथा मर्मतको लागि जानका लागि समेत कुनै अबरोध नभएको इन्टरनेट सेवा प्रदायक संस्था नेपाल(आइस्पान)ले जानकारी दिएको छ ।
तर सो मर्मतको कार्यमा समस्या आएको इन्टरनेट सेवा प्रदायकहरुले बताएका छन् ।
सरकारले ‘लकडाउन’ गरेर सार्वजनिक र निजी गाडिहरु संचालनमा प्रतिबन्ध लगाएसँगै इन्टरनेट सेवा प्रदायक(आईएसपी)हरुले नेटवर्कको नियमित मर्मत कार्य गर्न नसकिएको बताएका छन् ।
उनीहरुले मर्मतका लागि प्रयोग गरिने गाडिहरुलाई सरकारले अनुमति नदिएपछि मर्मत र नेटवर्कमा समस्या आउने र सेवा नै बन्द हुनसक्ने चेतावनी दिएका छन् ।
‘दैनिकरुपमा मर्मत र नेटवर्कको काम गर्नुपर्ने बेलामा जिल्ला प्रशासन कार्यालय र प्रहरीले नै हाम्रा गाडी चलाउन दिएका छैनन्, अनुमति नै नदिँदा इन्टरनेट सेवामा समस्या आउने पक्का छ,’ एक आईएसपी संचालकले नाम उल्लेख नगर्ने शर्तमा भने ।
उनकाअनुसार प्रशासनमा अनुमतिको लागि जाँदा दूरसंचार सेवा मात्र अत्यावश्यक सेवा भनेको र इन्टरनेट सेवा त्यसमा नपर्ने भनेर अनुमति नदिईएको हो । त्यसमा नेपाल दूरसंचार प्राधिकरणले ‘प्रो एक्टिभ’ भएर सहयोग गर्नुपर्ने उनको भनाई छ ।
इन्टरनेट सेवा प्रदायक संस्था नेपाल(आइस्पान)का अध्यक्ष भोजराज भट्टले पनि आईएसपीहरुको नेटवर्क र मर्मत कार्यमा अवरोध आएको बताए । उनले सो बारेमा प्रहरीको उच्च निकायमा कुरा भएपनि तल्लो तहसम्म जानकारी नहुँदा कामगर्न कठिन भएको गुनासो गरे ।
हामीले प्रहरीका एआईजीसँग कुरा गरेर यो अत्यावश्यक सेवामा पर्ने भनेका छौं, तर तल्लो तहसम्म खबर नपुग्दा मर्मत र नेटवर्कको काम रोकिएको छ,’ अध्यक्ष भट्टले भने, ‘पहिलो दिनमा नै समन्वयको अभावले यस्तो छ अझै ७ दिन के होला भन्ने अनुमान गर्न गाह्रो छ ।’
उनले अझैपनि समन्वयनको प्रयास गरिरहेको जानकारी दिए ।
इन्टरनेट सेवा प्रदायकहरुले ग्राहकहरुको घरसम्म तार तान्ने र त्यसको नियमित ममर्त संभार गर्नुपर्ने हुन्छ । आफ्नो नेटवर्कलाई चुस्त दुरुस्त राख्ने र ग्राहकहरुको आवश्यकताअनुसार सेवा दिनुपर्ने हुँदा उनिहरुका कर्मचारीहरु नियमितरुपमा फिल्डमा खटिएका हुन्छन् ।
प्रकाशित: ११ चैत्र २०७६, मंगलवार