इन्टरनेट सेवा प्रदायक भायानेट कारबाहीमा, दूरसंचार प्राधिकरणद्धारा ५० हजार रुपैयाँ जरिवाना

Technology Khabar २६ माघ २०७६, आईतवार

इन्टरनेट सेवा प्रदायक भायानेट कारबाहीमा, दूरसंचार प्राधिकरणद्धारा ५० हजार रुपैयाँ जरिवाना

काठमाडौं । नेपाल दूरसंचार प्राधिकरणले निर्देशन विपरितको कार्य गरेको भन्दै इन्टरनेट सेवा प्रदायक कम्पनी भायानेटलाई ५० हजार रुपैयाँ जरिवाना गरेको छ ।

भायानेटलाई प्राधिकरणको निर्देशन विपरित चिठ्ठामा आधारित उपहार कार्यक्रम संचालन गरेको विषयमा दोषि ठहर गर्दै ५० हजार रुपैयाँ जरिवाना गर्ने निर्णय गरेको हो । प्राधिकरणको गत माघ १७ गते बसेको बोर्ड बैठकले भायानेट कम्यूनिकेशन प्रालिलाई ५० हजार रुपैयाँ जरिवाना गर्दै कारबाहीको निर्णय गरेको हो ।

भायानेटले प्राधिकरणले दिएको निर्देशन विपरित चिठ्ठामा आधारित उपहार कार्यक्रम ‘गेट चान्स टू वीन १ ईयर अफर फ्रि इन्टरनेट एभ्री वीक थ्रो लक्की ड्र आवर सर्भिस (Get Chance to win 1 year of free internet every week through lucky draw our services)’ नामक योजना संचालन गरेको थियो । सो विषयमा कम्पनीलाई स्पष्टिकरण सोधिएको र सो स्पष्टिकरणपछि जरिवानाको निर्णय गरिएको प्राधिकरणका एक अधिकारीले जानकारी दिए ।

सो उपहार कार्यक्रम योजना प्राधिकरणले २०७० साल भदौ ३० गते दिएको दूरसंचार सेवा प्रदायक तथा इन्टरनेट सेवा प्रदायक संस्थाहरुलाई दिएको निर्देशन विपरित प्रचार प्रसार गरेको भन्दै प्राधिकरणले कारबाही गरेको हो ।

प्राधिकरणले भायानेटलाई दूरसंचार ऐन २०५३ को दफा ४७(१) बमोजिम ५० हजार रुपैयाँ जरिवाना गर्दै कारबाही गरेको हो ।

कम्पनीले अब सो जरिवाना रकम दूरसंचार प्राधिकरणलाई तिर्नुपर्नेछ ।

कानूनअनुसार प्राधिकरणको निर्देशन विपरित कार्य गर्ने दूरसंचार सेवा प्रदायकहरुलाई ५ लाख रुपैयाँसम्म जरिवाना गर्ने प्रावधान रहेको छ ।

यस्तो थियो २ वर्ष अगाडी तत्कालिन समयमा गरेको चिठ्ठा अफर-

TK Viber

प्रकाशित: २६ माघ २०७६, आईतवार

Loading...