सीजि कम्युनिकेशनको लिमिटेड मोबिलिटीको लाइसेन्स रद्ध, तोकिएको समयमा नवीकरण नै गरेन

Technology Khabar २१ माघ २०७६, मंगलवार

सीजि कम्युनिकेशनको लिमिटेड मोबिलिटीको लाइसेन्स रद्ध, तोकिएको समयमा नवीकरण नै गरेन
Classic Tech

काठमाडौं । नेपाल दूरसंचार प्राधिकरणबाट सी.जि. कम्युनिकेशन प्रालिले लिएको लिमिटेड मोबिलिटी सर्भिसको लाइसेन्स रद्ध भएको छ ।

दूरसंचार प्राधिकरणले आज सार्वजनिक सूचना जारी गर्दै सीजि कम्युनिकेशनको लिमिटेड मोबिलिटी सर्भिस बेस्ड अन वायरलेस टेलिकम्युनिकेसन्स(Limited Mobility Service Based on Wireless Telecommunications) सेवाको अनुमतिपत्र स्वतः रद्ध भएको जानकारी दिएको हो ।

कम्पनीले सो सेवाको अनुमतिपत्र नवीकरणका लागि नियमानुसार नवीकरणका दस्तुरसहित निवेदन पेश नगरेको हुँदा ती अनुमतिपत्रहरु स्वत रद्ध भएको हो । सीजिको ती लाइसेन्स माघ १९ गतेदेखि लागूहुनेगरि रद्ध भएको हो ।

यसअघि तत्कालिन समयमा एस. टि. एम. टेलिकम संचारको नाममा कम्पनीले लिमिटेड मोबिलिटीको अनुमति पत्र लिएको थियो । कम्पनीले विभिन्न ४१ जिल्लामा सेवा संचालन गर्नेगरि सो अनुमति पत्र लिएकोमा यसअघि नै ३५ जिल्लाका अनुमतिपत्रहरु रद्ध भईसकेको र बाँकी जिल्लाहरुमा रहेको लिमिटेड मोबिलिटीको अनुमतिपत्र रद्ध भएको प्राधिकरणका प्रवक्ता मिन प्रसाद अर्यालले जानकारी दिए ।

‘सीजिको लिमिटेड मोबिलिटीको अनुमतिपत्र नवीकरण गर्न निवेदन नदिएको हुँदा ऐनअनुसार स्वत: रद्ध भएको हो, कम्पनीको ग्रामीण दूरसंचार सेवाको लाइसेन्स भने यथावत नै छ,’ उनले भने ।

कम्पनीले २०६६ माघ १९ गते बाग्लुङ्ग, पाल्पा, कन्चनपुर, डडेलधुरा र बैतडीका लागि अनुमतिपत्र लिएको थियो ।

सीजिले मोबाइल सेवा संचालनको लागि यूनिफाईड लाइसेन्स लिन समेत प्राधिकरणमा निवेदन दिएको छ ।

प्रकाशित: २१ माघ २०७६, मंगलवार

Comments are closed.

Loading...