चार किस्तामा बाँकी लाभकर तिर्ने एनसेलको योजना, ‘सेड्यूल एप्रुभ’ नभएको राजस्व सचिवको भनाई

Technology Khabar १९ माघ २०७६, आईतवार

चार किस्तामा बाँकी लाभकर तिर्ने एनसेलको योजना, ‘सेड्यूल एप्रुभ’ नभएको राजस्व सचिवको भनाई
फाइल

काठमाडौं । पूँजीगत लाभकर तिर्ने विषयमा एनसेल प्रालिले चालु आर्थिक वर्ष किस्ताबन्दीमा रकम तिर्ने सुविधा माग गरेको छ ।

व्यवस्थापिका संसदको सार्वजनिक लेखा समितिको आजको बैठकमा अर्थ मन्त्रालयका राजस्व सचिव शिशिर कुमार ढुंगानाले बाँकी पूँजीगत लाभकर तिर्न एनसेलले किस्ताबन्दीरुपमा कर दाखिला गर्नेगरि योजना पेश गरेको जानकारी दिए ।

एनसेलले आफूले तिर्नुपर्ने बाँकी पूँजीगत लाभकरमध्ये ४ अर्ब ५० करोड यसअघि नै दाखिला गरेको र बाँकी रकम चालु आर्थिक वर्षभित्रै तिर्नेगरि किस्ताबन्दीको सुविधा माग गरेको उनले बताए ।

‘आयकर ऐन २०५८ को दफा ११० ‘क’ बमोजिम करदाताले किस्ताबन्दीरुपमा कर दाखिला गर्न सक्ने प्रावधान रहेको छ, सोहि अनुसार एनसेलले मार्च महिनाको अन्तिम, अप्रिल महिनाको अन्तिम, मे महिनाको अन्तिम र जून महिनाको अन्तिमसम्ममा मासिकरुपमा ४ अर्ब ५४ करोड रुपैयाँ बुझाउने योजना पेश गरेको छ,’ राजस्व सचिव ढुंगानाले भने ।

एनसेलले तिर्नुपर्ने करिब २२ अर्ब ४४ करोड रुपैयाँ मध्ये ४ अर्ब ५० करोड तिरिसकेको छ भने बाँकी रकम १८ अर्ब १८ करोड ५२ लाख २५ हजार ४९५ रुपैयाँ भने किस्तामा बुझाउन माग गरेको हो ।

सो रकम किस्ताबन्दीमा बुझाउन सकिने प्रावधान भएपनि ठूला कर दाता कार्यालयले भने त्यसको स्वीकृति दिएको छैन् ।

‘हामीले एनसेलको सेड्यूल एप्रुभ गरिसकेका छैनौं, अन्य ट्याक्स डिफल्ट छैन्,’ राजस्व सचिव ढुंगानाले स्पष्ट पारे ।

उनले चालु आवभित्रै जुनसुकै अवस्थामा रकम असुल गर्न तयार रहेको जानकारी दिए ।

ठूला करदाता कार्यालयले पनि एनसेलको पूँजीगत लाभकरको विषयमा नेपाल दूरसंचार प्राधिकरणले सोधेको पत्रको जवाफ दिँदै कर कार्यालयले पनि सोहि बिबरणअनुसारको पत्र पठाएको थियो । जसमा मासिकरुपमा ४ अर्ब ५४ करोड ६३ लाख ६ हजार रुपैयाँको दरले कर तिर्न किस्ताबन्दी योजना पेश गरेको उल्लेख छ ।

प्रकाशित: १९ माघ २०७६, आईतवार

Comments are closed.

Loading...