रोकियो दूरसंचार प्राधिकरणले प्रकाशित गर्दै आएको एमआईएस रिपोर्ट, कहिले आउला नयाँ तथ्यांक?

Technology Khabar २० मंसिर २०७६, शुक्रबार

रोकियो दूरसंचार प्राधिकरणले प्रकाशित गर्दै आएको एमआईएस रिपोर्ट, कहिले आउला नयाँ तथ्यांक?

काठमाडौं । नेपाल दूरसंचार प्राधिकरणले नियमितरुपमा प्रकाशित गर्दै आएको दूरसंचार क्षेत्रका तथ्यांकिय बिबरणहरु विगत साउन महिनादेखि रोकिएको छ ।

प्राधिकरणले दूरसंचार क्षेत्रको अवस्थाको बारेमा मासिकरुपमा तथ्यांकसहितको जानकारी राखेर एमआईएस प्रकाशित गर्दै आएकोमा गएको साउन महिना पछाडिको एमआईएस प्रकाशन ठप्प भएको छ ।

विगत ३ महिनादेखि प्राधिकरणद्धारा प्रकाशित गरिने एमआईएस रिपोर्ट प्रकाशन हुन नसक्दा प्राधिकरणका अधिकारीहरु नै पुराना तथ्यांकमा भर पर्नुपर्ने अवस्था आएको छ ।

यसअघि आर्थिक विश्लेषण शाखाको संयोजन र जिम्मेबारीमा तथ्यांकहरु संकलन गरेर नियमित मासिकरुपमा प्रकाशित हुँदै आएको एमआईएस रिपोर्ट साउन महिनादेखि रोकिएको छ । जबकि प्राधिकरणले अहिलेसम्म असोज महिनाको एमआईएस रिपोर्ट प्रकाशित गरिसक्नुपर्ने थियो ।

प्राधिकरणका एक अधिकारीले एमआईएस रिपोर्ट नियमित प्रकाशित हुन नसक्नु लार्पबाही भएको बताए । ‘एमआईएस रिपोर्ट प्रकाशन रोकिएको सबैलाई थाहा छ,  तर कसैले केहि भन्दैनन्,’ ती अधिकारीले भने ।

एमआईएस रिपोर्ट संयोजन र प्रकाशनको जिम्मा प्रशासन महाशाखाअन्तरगत शाखाको जिम्मा दिएपछि एमआईएस रिपोर्ट प्रकाशित हुन छाडेको हो ।

नेपाल दूरसंचार प्राधिकरणका निर्देशक तथा प्रवक्ता मिन प्रसाद अर्यालले आन्तरिक कारणले प्रकाशित नभएको बताए । ‘नयाँ शाखामा जिम्मेबारी गएको छ त्यसैले कर्मचारीहरुलाई शुरुमा कसरी एमआईएस प्रकाशित गर्ने भन्ने समस्या भएको हुन सक्छ, सम्बन्धित शाखामा बुझ्नेछु,’ प्रवक्ता अर्यालले भने ।

आधिकारीक मानेर अन्तराष्ट्रिय दूरसंचार क्षेत्रका संस्थाहरुले पनि प्रयोग गर्ने सो एमआईस रिपोर्ट कहिले देखि नियमित प्रकाशित हुन्छ भन्ने कुनै जानकारी छैन् ।

प्रकाशित: २० मंसिर २०७६, शुक्रबार

Comments are closed.

Loading...