भारतको दिल्लीमा फ्रि वाईफाई सुविधा घोषणा, प्रत्येक यूजरलाई हरेक महिना १५ जीबी डाटा उपलब्ध

काठमाडौं ।

काठमाडौं । भारतको राजधानी दिल्लीको सम्पूर्ण क्षेत्रहरुमा निशुल्क वाईफाई सुविधा उपलब्ध भएको छ । केहि समयपछि हुन लागेको विधानसभाको निर्वाचन अगाडि दिल्लीका मुख्यमन्त्री अरबिन्द केजरीवालले पुरै दिल्लीमा निशुल्क वाईफाई सुविधा घोषणा गरेका हुन् ।

दिल्ली सरकारले पुरै दिल्लीको ११ हजार स्थानहरुमा हटस्पट लगाउने बताएको छ । सो फ्रि वाईफाईमार्फत प्रत्येक यूजरलाई प्रति महिना १५ जीबी डाटा निशुल्क प्राप्त हुनेछ । यसको शुरुवात यहि डिसेम्बर १६ तारिखदेखि हुने बताईएको छ ।

फ्रि वाईफाईको विषय क्याबिनेटबाट पास भएको छ भने टेण्डरको प्रकृया समेत पुरा भईसकेको छ । क्याबिनेटले अगस्ट ८ मा ४ हजार बस स्टप र हरेक विधानसभामा १०० वटा हटस्पट जडान गर्न अनुमति दिएको थियो । हटस्पटको ५० मिटरको वरीपरीको रेन्जमा जतिपनि मानिसहरु रहन्छन उनीहरुले वाईफाईको प्रयोग गर्न सक्नेछन् ।

दिल्लीभरी निशुल्क वाईफाईको लागि सरकारले करिब १०० करोड भारु वार्षिकरुपमा खर्च गर्ने छ ।

मुख्यमन्त्री केजरीवालको पार्टी आम आदमी पार्टीले सन् २०१५ को विधानसभा चुनावमा दिल्लीमा निशुल्क वाईफाई दिने प्रतिबद्धता जाहेर गरेको थियो ।

सो फ्रि वाईफाई हटस्पट विधानसभा क्षेत्रको आधारमा जडान हुनेछ । पहिलो १०० हटस्पट १६ डिसेम्बरमा नै लन्च हुनेछ भने पहिलो साता १०० र त्यसपछि हरेक साता ५०० वटा हटस्पट जडान गरिनेछ । हरेक आधा किलोमिटरमा हटस्पट जडान हुने बताईएको छ ।

फ्रि वाईफाई हटस्पटबाट अधिकतम २०० देखि न्यूनतम १०० एमबीपीएसको स्पीड उपलब्ध हुनेछ । एक हटस्पटमा १०० जनाले एकैपटक इन्टरनेट चलाउन सक्नेछन् र यसको लागि एप तयार पारीएको छ ।

केवाईसी भरेर ओटीपीद्धारा वाईफाई कनेक्ट गर्न सकिन्छ । त्यसपछि यूजर जुन हटस्पटको नजिक जान्छ त्यहिँको इन्टरनेट वाईफाई अटोमेटिक कनेक्ट हुने दाबी गरिएको छ। एजेन्सी