Technology Khabar २६ कार्तिक २०७६, मंगलवार
काठमाडौं ।
काठमाडौं । नेपाल टेलिकम कम्पनीले सहायक कम्पनीको रुपमा ल्याउन लागेको डिजिटल पेमेन्ट सिस्टमको प्रकृया नेपाल राष्ट्र बैंकबाट अनुमति लिनको लागि पुगेको छ।
नेपाल दूरसंचार कम्पनी लिमिटेड(नेपाल टेलिकम) र राष्ट्रिय बाणिज्य बैंक मिलेर ल्याउन लागिएको डिजिटल पेमेन्ट कम्पनी तथा सिस्टमको प्रकृयाका लागि राष्ट्र बैंक पुगेको हो । दुबै कम्पनीले प्रस्तावित कम्पनीको नामसहित अनुमतिको लागि निवेदन दिएका छन् ।
नेपाल टेलिकमको सहायक कम्पनीको रुपमा आउने सो पेमेन्ट कम्पनीको प्रस्तावित विधान, कम्पनीको नामलगायतको विषय सकिएको र राष्ट्र बैंकमा लेटर अफ इन्टेन्टको अनुमति लिन निवेदन दर्ता गरेर कुरीरहेको राष्ट्रिय बाणिज्य बैंकका डेपुटी प्रमुख कार्यकारी अधिकृत सीए कबि राज अधिकारीले जानकारी दिए ।
‘हामीले सबै प्रस्तावहरु तयार पारेर कम्पनी दर्ताभन्दा अगाडिको प्रकृया सकिसकेका छौं र राष्ट्र बैंकमा एलओआईको लागि निवेदन दिएका छौं, अनुमति आएपछि मात्रै कम्पनी दर्ता प्रकृयामा जानेछ, डेपुटी प्रमुख कार्यकारी अधिकृत अधिकारीले टेक्नोलोजीखबरसँग भने ।
उनकाअनुसार कम्पनीको नाम डिजिटल पेमेन्ट कम्पनी लिमिटेड प्रस्ताव गरिएको छ भने त्यसको कुल अधिकृत पूँजी १ अर्ब रुपैयाँ हुनेछ । कम्पनीको बहुमत शेयर नेपाल टेलिकमको हुने र बाँकी शेयर बाणिज्य बैंकले लिनेछ ।
‘शेयरको बारेमा ठ्याक्कै भन्न सकिँन तर अधिकांश शेयर टेलिकमको हुनेछ र उसकै सहायक कम्पनीको रुपमा आउनेछ, हामी वित्तीय सहयोगी कम्पनीको रुपमा मात्र हुनेछौं,’ डेपुटी प्रमुख कार्यकारी अधिकृत अधिकारीले स्पष्ट पारे ।
उनकाअनुसार टेलिकमको २ करोड भन्दा बढि ग्राहकहरु र बाणिज्य बैंकको ३० लाख खातावालहरुलाई समेट्ने गरि सो पेमेन्ट सिस्टम आउनेछ ।
राष्ट्र बैंकबाट लेटर अफ इन्टेन्ट पाएपछि कम्पनीको नाम, शेयर संरचनाको बारेमा कम्पनी रजिस्ट्रार कार्यालयमा प्रकृया पुर्याएपछि मात्र विधिवत कम्पनी दर्ता हुनेछ ।
यसैगरि नेपाल टेलिकमका एक अधिकृतकाअनुसार राष्ट्र बैंकबाट अनुमति आउने बित्तिकै सबै कामहरु द्रूतगतिमा अगाडि बढाउने गरि तयारी अवस्थामा कम्पनी रहेको छ । ‘हामी तयारी अवस्थामा छौं, राष्ट्र बैंकले कहिले अनुमति दिन्छ त्यसमा भर पर्नेछ,’ उनले भने ।
टेलिकमले कम्पनीको प्रबन्ध पत्र, विनियमावली, संगठन संरचना लगायतका विषयहरुको कागतपत्र संयुक्तरुपमा परामर्शदाता राखेर नै तयार पारिसकेका छन् ।
यसअघि गएको वैशाख १९ गते राष्ट्रिय सूचना, संचार प्रविधि दिवसको अवसर पारेर नेपाल टेलिकम र बाणिज्य बैंकबिच समझदारी पत्रमा हस्ताक्षर भएको थियो । टेलिकमले यसलाई यूटिलिटी पेमेन्ट कम्पनी र सिस्टमको रुपमा ल्याउन खोजेको छ ।
तत्कालिन समयमा नेपाल टेलिकमका प्रबन्ध निर्देशक डिल्लीराम अधिकारीले दशैं अगाडि नै डिजिटल पेमेन्ट शुरु गर्नसकिने विश्वास व्यक्त गरेका थिए । तर सात महिना पुरा भईसक्दापनि कम्पनी अझै दर्ता हुन सकेको छैन् ।
प्रकाशित: २६ कार्तिक २०७६, मंगलवार