अनलाइन गेम पबजीको प्लेयर्स संख्या ८२ प्रतिशतले घट्यो, प्लेयर्सलाई आकर्षित गर्न नयाँ अपडेट

Technology Khabar १८ कार्तिक २०७६, सोमबार

अनलाइन गेम पबजीको प्लेयर्स संख्या ८२ प्रतिशतले घट्यो, प्लेयर्सलाई आकर्षित गर्न नयाँ अपडेट
फाइल: क्यान इन्फोटेक २०१९ मेलामा पबजी खेल्दै एक युवक

काठमाडौं । नेपाली युवाहरुबिच निकै लोकप्रिय रहेको पबजी अनलाइन गेमको लोकप्रियता कम हुँदै गएको रिपोर्ट आएको छ । नेपालसहित विश्वभर निकै खेलिने मध्येको अनलाइन गेम प्लेयर अननोन्स ब्याटलग्राउण्ड अर्थात पबजीको लोकप्रियता गत वर्षको भन्दा ८२ प्रतिशतले घटेको देखिएको छ ।

आइकोनिक ब्याटल रोयल गेम पबजीले जनवरी २०१८ को तुलनामा ८२ प्रतिशत प्लेयर्स गुमाएको स्टीम चार्टसको रिपोर्टमा उल्लेख छ ।

स्टीम चार्टसको डाटाअनुसार पछिल्लो चार सातामा पबजीका औसत मासिक प्लयर्स २,८८,८४८ रहेको छ । तर सन् २०१८ जनवरीमा यो डाटा १,५८४,८८६ प्लेयर्स प्रति महिना रहेको थियो । तथ्यांकलाई हेर्दा पबजीको सक्रिय प्लेयर्सको संख्यामा उच्च गिरावट आएको देखिन्छ ।

पबजी गेमले जून २०१८ मा ४० करोड प्लेयर्सको लगइन संख्या पुगेको थियो । यो गेमले आफ्नो सक्रिय प्लेयर्सको संख्या लगभग एक सालसम्म १० लाख भन्दा माथि राखेको थियो जुन संख्या २०१८ सेप्टेम्बरमा घटेको थियो ।

पछिल्लो दिनमा आएको प्लेयर्सहरुको कमीलाई पूर्ति गर्न र प्लेयर्सलाई फिर्ता ल्याउन कम्पनीले नयाँ अपडेटहरु ल्याईरहेको छ । हालै मात्र कम्पनीले अपडेट ५.१का साथ सिजन ५ रिलिज गरेको थियो । यो नयाँ अपडेटमा कम्पनीले कयौं नयाँ फिचर्स तथा एलिमेन्टलाई जोडेको थियो ।

त्यसैगरि पबजीले अर्को अनलाइन गेम फोर्टनाइटको देखासिकी गर्दै गेममा भेण्डिंग मेसिन पनि जोडेको छ ।

पबजीले ल्याएको नयाँ अपडेटले प्लेयर्सहरुलाई सो प्लेटफर्ममा कत्तिको आकर्षित गर्दछ भन्ने हेर्न केहि समय कुर्नुपर्ने हुन्छ । एजेन्सी

प्रकाशित: १८ कार्तिक २०७६, सोमबार

Comments are closed.

Loading...