५जी सेवा चीनमा व्यवसायीकरुपमा शुरु, मासिक न्यूनतम १२८ यूआन तिरेर ३० जीबी डाटा पाईने

Technology Khabar १५ कार्तिक २०७६, शुक्रबार

५जी सेवा चीनमा व्यवसायीकरुपमा शुरु, मासिक न्यूनतम १२८ यूआन तिरेर ३० जीबी डाटा पाईने

काठमाडौं । चीनमा ५जीको व्यवसायीक प्रयोग औपचारिकरुपमा शुरु भएको छ । यसलाई विश्वको सबैभन्दा ठूलो ५जी नेटवर्कको रुपमा लिईएको छ ।

देशका तीन सरकारी टेलिकम अपरेटरहरुले आफ्नो नयाँ पुस्ताको वायरलेस टेक्नोलोजी शुक्रबारदेखि शुरु गरेका छन् । चाइना मोबाइल, चाइना टेलिकम र चाइना यूनिकमले बिहिबार आफ्नो ५जी सेवा शुरु गर्दै ५जी प्लान घोषणा गरेका थिए ।

चिनियाँ अपरेटरहरुले न्यूनतम १२८ यूआन अर्थात करिब १८ डलरदेखि ५जी प्रविधिमा ३० जीबी डाटा प्रति महिना दिनेछन् । ५जी अल्ट्रा फास्ट सर्भिसको रुपमा चीनमा आएको हो ।

समाचार एजेन्सी सिन्ह्वाकाअनुसार हाल पहिलो चरणमा चीनको राजधानी बेईजिंङ्गसहित सांघाई, ग्वाउझाउ र सेन्झेनलगायत विभिन्न ५० शहरहरुमा ५जी सेवा व्यवसायीकरुपमा उपलब्ध भएको छ ।

५जी नेटवर्कका लागि चीनमा यसवर्षको अन्त्यसम्ममा १ लाख ३० हजार बेस स्टेशनहरु सक्रिय गरिसक्ने सरकारी योजना रहेको छ । जसमध्ये सांघाईमा मात्रै हाल ११ हजार ८५९ वटा ५जी बेस स्टेशनहरु अक्टोबरको मध्यसम्ममा संचालनमा ल्याईसकिएको छ, जसले शहरका महत्वपूर्ण क्षेत्रहरुमा ५जी नेटवर्क कभरेज गर्न सक्नेछ ।

चीनमा ५जी सेवा शुरुवातसँगै कम्यूनिकेसन टेक्नोलोजी उच्च तहमा पुग्ने अपेक्षा गरिएको छ । तीन प्रमुख मोबाइल अपरेटरहरुले यसअघि नै १ करोड ५जी प्रयोगकर्ताहरु आधिकारीकरुपमा सेवा शुरु हुनुभन्दा पहिले नै दर्ता गराईसकेका छन् ।

चीनले सन् २०२५ सम्ममा ६० करोड ५जी सेवाग्राहीहरु पुग्ने अपेक्षा गरेको छ जून समग्र विश्वको ४० प्रतिशत हुनेछ ।

५जी सेवा सबैभन्दा पहिले दक्षिण कोरियामा व्यवसायीक प्रयोगमा आएको थियो भने त्यसपछि अमेरिका र बेलायतमा संचालनमा आईसकेका छन् । एजेन्सी

प्रकाशित: १५ कार्तिक २०७६, शुक्रबार

Comments are closed.

Loading...