नर्वेले ह्वावेलाई ५जी नेटवर्क बनाउन प्रतिबन्ध नलगाउने, कम्पनीहरुले नै आपूर्तिकर्ता छनौट गर्नसक्ने

काठमाडौं ।

काठमाडौं । यूरोपेली मुलुक नर्वेले चीनको ह्वावे टेक्नोलोजीलाई देशको ५जी टेलिकम नेटवर्क बनाउन रोक्ने कुनै योजना नभएको बताएको छ ।

नर्वेका क्याबिनेट मन्त्री निकोलाई आस्ट्रपले ह्वावेलाई टेलिकम नेटवर्क बनाउन रोक्ने योजना नभएको बताएका हुन् ।

विश्वको सबैभन्दा ठूलो टेलिकम उपकरण निर्माता कम्पनी ह्वावे गएको मे महिनादेखि अमेरिकी व्यापारको कालो सूचीमा रहेको छ । अमेरिकाले ह्वावेलाई आफ्ना उपकरणहरुमार्फत बेईजिङ्गको लागि जासुसी गर्ने गरेको आरोप लगाउँदै आएको छ भने ह्वावेले सो आरोप अस्विकार गर्दै आएको छ ।

यसका साथै अमेरिकाले आफ्ना मित्रराष्ट्रहरुसँग ह्वावेलाई ५जी नेटवर्क बनाउन नदिन अनुरोध गर्दै आएको छ । तर नर्वेले भने अमेरिकी अलायन्सभन्दा फरक विचार राखेको छ ।

‘हामीले कम्पनीहरुसँग सेक्यूरिटी बारे राम्रो छलफल गरेका छौं, र त्यसपछि कम्पनीहरुले आफैंले नै सप्लायरहरु छनौट गर्न सक्नेछन्, हामीले अहिलेसम्म नर्वेमा कुनैपनि सप्लायरको विरुद्धमा प्रतिबन्ध लगाएका छैनौं,’ क्याबिनेट मन्त्री निकोलाई आस्ट्रपले रोयटर्ससँग भने । आस्ट्रप नर्वे सरकारका डिजिटल रणनिती प्रबद्र्धन गर्ने मन्त्री हुन् ।

नर्वेको सरकार नियन्त्रित टेलिकम अपरेटर टेलनोर सबैभन्दा ठूलो टेलिकम सेवा प्रदायक हो, जसले २०२० मा व्यवसायीकरुपमा संचालन हुने ५जी टेक्नोलोजीको लागि यहिवर्ष सप्लायर आपूर्ति गर्ने योजना लिएको छ ।

सो कम्पनीसँग यूरोप र एशियाका विभिन्न ८ देशहरुमा १८ करोड २० लाख सब्सक्राईबरहरु छन् । कम्पनीले पहिलो प्रमुख सम्झौता ह्वावेसँग २००९ मा गरेको थियो ।