Technology Khabar १२ भाद्र २०७६, बिहीबार
काठमाडौं ।
काठमाडौं । ह्वावे टेक्नोलोजीजले आफ्नो नयाँ हाईएण्ड स्मार्टफोन यूरोपमा लन्च गर्ने तयारी गरिरहेको छ यदपि कम्पनीले नयाँँ डिभाइसमा गूगलको आधिकारिक एन्ड्रोयड भने प्रयोग गर्नेछैन् ।
विश्वको दोस्रो ठूलो स्मार्टफोन मेकर कम्पनीले नयाँ मेट ३० सिरिज यहि सेप्टेम्बर १८ मा जर्मनीको म्यूनिखमा लन्च गर्ने तयारी गरिरहेको छ भने सो डिभाइस कहिले बिक्रीका लागि उपलब्ध हुन्छ भन्ने स्पष्ट छैन् । ह्वावेको मेट ३० सिरिजमा कम्पनीले आधिकारिक एन्ड्रोयड अपरेटिंग सिस्टम र वृहतरुपमा प्रयोग हुने गूगल म्याप्स जस्ता एप्सहरु राख्नेछैन् ।
ह्वावेको मे ३० नयाँ ५जी मोबाइल नेटवर्कमा प्रयोग गर्नेगरि बनाईएको हो जून अमेरिकाले लगाएको प्रतिबन्धपछि पहिलो मूख्य फ्ल्यागशिप स्मार्टफोनको रुपमा बजारमा आउन लागेको हो । अमेरिकाले कम्पनीलाई राष्ट्रिय सूरक्षाको कारणले प्रतिबन्ध लगाएको बताउँदै आएको छ भने ह्वावेले सो आरोप अस्विकार गर्दै आएको छ ।
गूगलका प्रवक्ताले रोयटर्ससँग कुरा गर्दै अमेरिकी प्रतिबन्धका कारण मेट ३० ले गूगलको लाइसेन्सयुक्त एप्स र सर्भिसहरु प्रयोग गर्न नसक्ने बताएका छन् । हालै अमेरिकी सरकारले ह्वावेलाई थप ९० दिनको लागि अस्थाई राहत दिएको थियो । तर सो राहत मेट ३० जस्तो नयाँ उत्पादनहरुका लागि भने होईन् ।
अमेरिकी कम्पनीहरुले आफ्ना उत्पादन तथा सेवाहरु ह्वावेलाई बेच्न विशेष लाइसेन्स लिनेपर्ने हुन्छ । तर सो लाइसेन्स अहिलेसम्म कसैलाई दिईएको छैन् ।
गूगलले पनि सो लाइसेन्सको लागि आवेदन गरेको छ र यसअघि कम्पनीले ह्वावेसँग कारोबार गर्न चाहेको बताएको थियो ।
ह्वावेको मेट ३० को लन्च आएसँगै ह्वावेका लागि अनिश्चितता पनि रहेको छ ।
यदि अमेरिकी सरकारले अनुमति दिएको खण्डमा ह्वावेले एन्ड्रोयड ओएस र ईकोसिस्टम निरन्तर प्रयोग गर्ने ह्वावेका प्रवक्ता जोई केलीले बताए । सो नभएको खण्डमा कम्पनीले आफ्नै अपरेटिंग सिस्टम र ईकोसिस्टम विकास गर्ने उनले स्पष्ट पारेका छन् ।
ह्वावेले एन्ड्रोयडको ओपन भर्सन पनि प्रयोग गर्न सक्नेछ तर यूरोपेली बजारका लागि भने गूगलका एप्स यूरोपमा अनुमतिलिएर मात्र प्रयोग गर्न सकिन्छ । यूरोप बाहेकलाई भने लाइसेन्सका लागि कुनै शुल्क छैन् ।
त्यसैले पनि विश्लेषकहरुले यूरोपेली बजारमा ह्वावेले आफ्नो व्यवसाय कायम राख्न गूगलको एन्ड्रोयड प्रयोग गर्नु आवश्यक हुने बताउँदै आएका छन् ।
ह्वावेले यो महिनाको शुरुवातमा नै आफ्नो नयाँ मोबाइल अपरेटिंग सिस्टम हार्मोनी लन्च गरेको थियो तर सो अझै एन्ड्रोयडको विकल्पको रुपमा भने आउनसक्ने अवस्थामा छैन् ।
प्रकाशित: १२ भाद्र २०७६, बिहीबार