यी १६ वर्षे युवकले अनलाइन गेम फोर्टनाइटको वर्ल्डकप जिते, ३० लाख अमेरिकी डलर पुरस्कार पाए

काठमाडौं ।

काठमाडौं । अनलाइन गेम फोर्टनाइटको सबैभन्दा ठूलो प्रतिस्पर्धाको फाइनल एक १६ वर्षे युवाले जितेका छन् । यहि आइतवार भएको फाइनलको एकल प्रतियोगीतामा अमेरिकी युवा कायले ‘बुगा’ गीसडर्फले जितेका छन् ।

ईस्पोर्टमा भिडियो गेमको सबैभन्दा ठूलो प्रतियोगिता मानिएको फोर्टनाइट वल्र्डकपको फाइनलमा १०० जना प्रतिस्पर्धी सहभागी भएका मध्ये १६ वर्षे गीसडर्फले ३० लाख अमेरिकी डलरसहित पहिलो पुरस्कार जितेका हुन् ।

अमेरिकाको न्यूयोर्कमा रहेको एसे टेनिस स्टेडियममा आयोजना भएको सो प्रतियोगीतामा विश्वभरबाट १० साताको क्वालिफाईंग राउण्डबाट छानिएका १०० जना फाइनलमा सहभागी भएका थिए । जसमा रहेको पुरस्कार राशी अहिलेसम्मकै सबैभन्दा ठूलो नगद राशी हो । यो प्रतियोगितामा कुल ३० मिलियन डलरको अवार्ड विभिन्न तहमा राखिएको थियो ।

गीसडर्फले सो फाइनलमा अन्य चर्चित प्रोफेसनल तथा नाम चलेका स्ट्रीमर प्रतियोगीहरुलाई पछाडि पार्दै पहिलो स्थान हात पारेका हुन् । उनले पहिलो राउण्डमा नाइन ‘इन-गेम किल्स’ गरेर अन्य प्रतिस्पर्धीलाई पछाडि पारेका थिए भने प्रत्येक चरणमा उनले दजनौं इन गेम किल्समा सफल भएका थिए । उनले समग्रमा ५९ अंक हासिल गर्दै पहिलो स्थान हात पारे ।

सो प्रतियोगीताको दोस्रो स्थान भने २४ वर्षिय ह्यारिसन पाल्म चांगले जितेका छन जसले १.८ मिलियन डलर हात पारे भने अर्का प्रतियोगी इपिकह्वेलले तेस्रो स्थानमा रहँदै १.२ मिलियन डलर घर लगे । चौथो स्थानमा रहेका नट क्रेयो कोउले भने १.०५ मिलियन अमेरिकी डलर हात पारेका थिए ।

यसअघि एमेच्योर र प्रोफेसनल कम्पिटिसन, डु्ओ टुर्नामेन्टलगायतका प्रतियोगीता समेत भएका थिए । ट्वीचकाअनुसार यो फोर्टनाइट वल्र्ड कप अनलाइनमा करोडौं मानिसहरुले हेरेका थिए ।

सो फाइनलमा पाँचौं स्थानमा भने अर्जेन्टिनाका १३ वर्षका थिआगो ल्याप रहन सफल भएका थिए । प्रमुख पाँच स्थान मध्ये उनी मात्र अमेरिका भन्दा बाहिरका युवा प्रतियोगी थिए । उनले ९ लाख अमेरिकी डलर घर लान सफल भए ।

यसका फाइनलमा सहभागी प्रतियोगीले कम्तीमा ५० हजार डलर घर लगे ।

चीनको टेनसेन्टद्धारा निर्माण गरिएको यो अनलाइन गेम विश्वभर लोकप्रिय रहेको छ । यसको लागि विश्वभरबाट उच्चतहका भिडियो गेम प्लेयरसहभागी भईरहेका छन्् । यसमा टिनएजर प्लेयरहरु पनि सहभागी रहेका छन्, जसमध्ये अधिकांश १६ वर्षमुनिका युवाहरु रहेको बताईएको छ । जसमध्ये करिब ३० प्लेयरहरुमध्ये एक जना संभावित बिजेता हुने अनुमान छ ।

फोर्टनाइटका विश्वभर २५ करोड यूजरहरु रहेका छन् । फोर्टनाइट निशुल्क खेल्न सकिने अनलाइन तथा मोबाइल गेम हो तर यसमा हुने इन गेम आइटमहरु भने अनलाइन किन्नुपर्ने हुन्छ, जसमार्फत कम्पनीले करोडौं डलर कमाउने गर्दछ ।

अनुसन्धानकर्ताहरुले यो वर्ष विश्वभर ईस्पोर्टका अडियन्सहरु वृद्धि हुँदै ४५ करोड भन्दा बढि हुने प्रक्षेपण गरेका छन् । एजेन्सी