अपटेड समाचार

ब्रिटिस एअरवेज डाटा चोरीमा दोषी ठहर, २२ करोड ९० लाख ७० हजार अमेरिकी डलर जरिवाना

लण्डन । बेलायती विमान कम्पनी ब्रिटिस एअरवेजलाई लाखौँ यात्रुको डाटा चोरीमा दोषी ठहर गर्दै १८ करोड ३० लाख ३९ हजार पाउण्ड सटर्लिङ (२२ करोड ९० लाख ७० हजार अमेरिकी डलर) जरिवाना गरिएको छ ।

कम्पनीलाई गत वर्ष सेक्यूरिटी सिस्टममा भएको घुसपैठमार्फत डाटा चोरीको आरोपमा विमान कम्पनीको मातृ समूह इन्टरनेशनल एअरलाइन्स ग्रुप (आएजी) ले सोमबार जनाएको छ ।

ह्याकरहरूले गत बर्ष विमानका लाखौँ यात्रुहरूको तथ्याङ्क तथा बैंक विवरण चोरी गरी कानूनविपरित काम गरेको अभियोग लागेको हो ।

बेलायतको इन्फर्मेशन कमिसनर्स अफिस अर्थात सूचना आयुक्तको कार्यालयले लगाएको सो जरिवानामा कम्पनीले असन्तुष्टि व्यक्त गरेको छ ।

आइएजीद्वारा जारी गरिएको विज्ञप्तिमा भनिएको छ, ‘बेलायतको तथ्याङ्क संरक्षण ऐन अनुसार बेलायतको सूचना आयुक्तको कार्यालयले ब्रिटिस एअरवेजलाई कुल १८ करोड ३० लाख ३९ हजार पाउण्ड स्टर्लिङको जरिवाना गरिएको छ ।’

कार्यालयकाअनुसार सो घट्नामा ब्रिटिस एयरबेजको वेबसाइटलाई फ्रड गर्ने साइटमा रिडाईरेक्ट गरिएको थियो । जसमा ५ लाख यात्रुहरुको डाटा दूरुपयोग गरिएको थियो ।

सो घट्ना गत वर्ष २०१८ अक्टोबरमा सार्वजनिक भएको थियो । जसमा यात्रुको नाम, ईमेल, क्रेडिट कार्ड नम्बर, कार्डको समय सकिने अवधि, कार्डमा हुने तीनवटा सीसीभी नम्बरहरु चोरिएका थिए । तर त्यसमा यात्रुको पासपोर्ट र यात्रा बिबरणहरु भने सुरक्षित थिए ।

आइएजीका अनुसार यो जरिवाना रकम ब्रिटिस एअरवेजको सन् २०१७ मा भएको खूद मुनाफाको १.५ प्रतिशत बराबर हो । एजेन्सी