एप्पलले म्याक प्रो डेस्कटपको उत्पादन यूनिट चीनमा सार्ने, ६,००० अमेरिकी डलर मूल्य

काठमाडौं । एप्पलले आफ्नो म्याक प्रो डेस्कटप बनाउने यूनिट अमेरिकाबाट चीनमा सार्ने भएको छ । कम्पनीले यसअघि आफ्नो म्याक प्रो अमेरिकाको टेक्सासमा एसेम्बल गर्दै आएको थियो भने मेड इन यूएसए लेबलमा बिक्री गरिरहेको थियो ।

एप्पलले सन् २०१९ मा ल्याउने म्याक प्रो भने चीनमा उत्पादन गर्ने तयारी गरेको हो । चिनियाँ कम्पनी क्वान्टाले एप्पलको ६,००० अमेरिकी डलर प्लस पर्ने म्याक प्रो उत्पादन गर्नेछ । सो प्लान्टले यसअघि पनि एप्पलका विभिन्न म्याकबुक प्रो उउत्पादन गरेको छ ।

चीनमा एप्पलको म्याक प्रो एसेम्बल्ड गर्दा लागत कम हुने र कम्पोनेन्टहरु पनि सजिलै उपलब्ध हुनेछन् । यसले गर्दा आगामी दिनमा एप्पलको शिपिंग लागत घट्ने अनुमान गरिएको छ ।

चीन एप्पलको लागि प्रमुख बजार मध्ये हो भने मुख्य उत्पादन केन्द्र पनि हो । कम्पनीले करिब १८ प्रतिशत आम्दानी चीनबाट मात्र पहिलो त्रैमासमा पाएको थियो ।

एप्पलको म्याक प्रो मेसिन क्रिएटिभ प्रोफेस्नलहरुले प्रयोग गर्ने गर्दछन् । एजेन्सी