काठमाडौं ।
अनुज राज ।
काठमाडौं । नेपाल दूरसंचार प्राधिकरणले एनसेल प्रालिलाई डाटा सेवाको महशुल दर घटाउन निर्देशन दिएको छ ।
प्राधिकरणको बोर्ड बैठकले एनसेललाई हालको डाटा सेवाको शुल्क महंगो भएको भन्दै नयाँ शुल्क कायम गर्न निर्देशन दिएको हो ।
एनसेल प्रालिको डाटा सेवाको महशुर दर पुनरावलोकन गर्ने विषयमा बोर्ड बैठकले छलफल गरेर आगामी साउन १ गतेदेखि प्रति एमबी २ रुपैयाँ मात्र डाटाको सेवा शुल्क लिन पाउने निर्देशन दिएको स्रोतले जानकारी दिएको छ ।
यसअघि एनसेलको डाटा शुल्क पुनरावलोकनका लागि कम्पनीले प्राधिकरणमा निवेदन दिएको तर सो महशुल रकम अन्य सेवा प्रदायकहरुको भन्दा पनि निकै महंगो प्रस्ताव गरेको थियो । एनसेलले हालको डाटा सेवा शुल्क प्रति एमबी ३ रुपैयाँलाई घटाएर प्रति एमबी २ रुपैयाँ ७५ पैसा कायम गर्न निवेदन दिएको थियो ।
तर प्राधिकरण बोर्डले सो प्रस्तावित रकम हाल बजारमा अन्य सेवा प्रदायक प्रतिस्पर्धी कम्पनीहरुको भन्दा निकै महंगो भएको हुँदा बोर्डले प्रति एमबी २ रुपैयाँ सम्म मात्र कायम गर्न निर्देशन दिएको हो । प्राधिकरणले हाल अन्तराष्ट्रिय बजारमा ब्याण्डविथको रेटमा आएको कमी तथा एनसेलले नै संचालन गरेको विभिन्न डाटा प्याकको दर पनि घट्दै गईरहेको हुँदा नयाा दर तोकेको जनाएको छ ।
एनसेलको हालको डाटा सेवाको महशुल दर प्रति एमबी ३ रुपैयाँ २०७१ फागुन २७ गते निर्धारण गरिएको थियो तर अहिलेसम्म कम्पनीको सो दर घट्न सकेको छैन् ।
डाटा सेवाको महशुल दर एनसेलले आउँदो साउन १ गतेदेखि लागू गर्ने हुँदा एनसेल सेवाग्राहीहरुलाई सो घटेको दरबाट लाभ हुनेछ ।
अन्य सेवा प्रदायकहरुमध्ये नेपाल टेलिकमको प्रति एमबी डाटा शुल्क १ रुपैयाँ छ भने स्मार्ट टेलिकमको प्रति एमबी डाटा शुल्क २ रुपैयाँ रहेको प्राधिकरणको भनाई छ ।
प्रकाशित: ११ असार २०७६, बुधबार
