साओमी रेडमी सिरिजको दुई फोन बजारमा, ४८ मेगापिक्सेलको स्मार्टफोन २२ हजारमै

Technology Khabar २२ चैत्र २०७५, शुक्रबार

साओमी रेडमी सिरिजको दुई फोन बजारमा, ४८ मेगापिक्सेलको स्मार्टफोन २२ हजारमै

काठमाडौं ।

काठमाडौं । साओमीले नेपाली बजारमा दुई नयाँ स्मार्टफोन सार्वजनिक गरेको छ । कम्पनीले बजारमा साओमी रेडमी नोट ७ र रेडमी सेभेन लन्च गरेको हो ।

साओमी नेपालले शुक्रबार एक कार्यक्रम आयोजना गरी रेडमी सिरिजका दुई नयाँ स्मार्टफोन ल्याएको हो जसमध्ये रेडमी सेभेन कम्पनीले रेडमीलाई छुट्टै ब्राण्ड घोषणा गरेपछि सार्वजनिक गरिएको थियो ।


रेडमी नोट सेभेन (Redmi Note 7)

विशेषगरि स्मार्टफोनबाट फोटो तथा भिडियो खिच्न रुचाउने प्रयोगकर्ताहरुलाई ध्यानमा राखेर ल्याएको रेडमी नोट सेभेनमा ४८ मेगापिक्सेल प्लस ५ मेगापिक्सेलको रियर क्यामरा छ, जसमा १२ मेगापिक्सेलको इमेजलाई चारगुणा ठूलो स्तरमा देखाउने टेट्रासेल टेक्नोलोजी प्रयोग गरिएको छ। यो क्यामरामा आर्टिफिसियल इन्टेलिजेन्सको प्रयोग गरिएको छ । यसमा सेल्फीका लागि १३ मेगापिक्सेलको फ्रन्ट क्यामरा छ ।

क्वालकम स्न्यापड्रागन ६६० एआईई चीपसेट प्रयोग गरिएको यो स्मार्टफोनमा ४,००० एमएएचको ब्याट्री पावर छ । यसमा क्वालकमको क्वीक चार्ज ४ टेक्नोलोजी रहेको छ । त्यस्तै फोनमा आईआर ब्लास्टर प्रविधि छ जसले विभिन्न होम अप्लाएन्सेसहरु नियन्त्रण गर्न सकिनेछ । गोरिल्ला ग्लास ५ प्रयोग गरिएको रेडमी नोट सेभेनमा ६.३ इन्चको फूलएचडी प्लस डिस्प्ले राखिएको छ ।

रेडमी नोट सेभेन ३ जीबी र्याम ३२ जीबी स्टोरेज, ४ जीबी र्याम र ६४ जीबी स्टोरेज तथा ४ जीबी र्याम र १२८ जीबी स्टोरेज भेरिएन्टहरुमा आउनेछ । यो फोन स्पेस ब्ल्याक, नेप्च्यून ब्लू, र नेबुला रेड कलर अप्सनमा आउँछ भने यसको बजार मूल्य क्रमशः २१,९९९ रुपैयाँ, २४,९९९ रुपैयाँ र २६,९९९ रुपैयाँ तोकिएको छ ।

रेडमी सेभेन (Redmi 7)

त्यसैगरि अर्को स्मार्टफोन रेडमी सेभेनमा ६.२६ इन्चको एचडी प्लस डट ड्रप डिस्प्ले डिजाइन रहेको छ जसलाई कोर्निंग गोरिल्ला ग्लास ५ द्धारा सुरक्षित पारिएको छ ।

फोनमा ४,००० एमएएच ब्याट्री प्याक रहेको छ भने यसमा क्वालकम स्न्यापड्रागन ६३२ चीपसेट राखिएको छ ।

स्मार्टफोन लन्च गर्दै साओमी नेपालका जनरल म्यानेजर सौरभ कोठारीले भने , रेडमी सिरिजका स्मार्टफोनहरुमा रेडमी नोट सेभेन तथा रेडमी सेभेन उत्कृष्ट स्मार्टफोनको रुपमा आएका छन् ।

रेडमी नोट सेभेनमा पावरफुल ४८ मेगापिकसेलको क्यामरा छ भने यसको ग्रेडिएन्ट डिजाइनले यसलाई उत्कृष्ट बनाएको छ ।

रेडमी सेभेन स्मार्टफोन २जीबी र्याम र १६ जीबी स्टोरेज तथा ३ जीबी र्याम र ३२ जीबी स्टोरेजमा उपलब्ध हुनेछ जसको बजार मूल्य क्रमशः १४, ९९९ रुपैयाँ तथा १६, ९९९ रुपैयाँ तोकिएको छ ।

यी दुबै स्मार्टफोनहरु अप्रिल ७ तारिखदेखि नेपाली बजारमा अनलाइन तथा अफलाइन स्टोरहरुमा उपलब्ध हुने कम्पनीले जानकारी दिएको छ ।

Global Bank
easy care

प्रकाशित: २२ चैत्र २०७५, शुक्रबार