ब्रोडब्याण्डको पहुँच एक वर्षमा नै १३ प्रतिशतले बढ्यो, मोबाइल ब्रोडब्याण्ड धेरै प्रयोग

Technology Khabar १४ चैत्र २०७५, बिहीबार

ब्रोडब्याण्डको पहुँच एक वर्षमा नै १३ प्रतिशतले बढ्यो, मोबाइल ब्रोडब्याण्ड धेरै प्रयोग
Classic Tech

काठमाडौं । पछिल्लो १ वर्षमा नेपालमा ब्रोडब्याण्ड प्रयोगकर्ताहरुको संख्यामा १३ प्रतिशत भन्दा बढिको वृद्धि भएको छ । नेपाल दूरसंचार प्राधिकरणले हालै सार्वजनिक गरेको माघ महिनाको एमआईएस रिपोर्टअनुसार गत आर्थिक वर्षको फागुन महिनाको तुलनामा चालु आर्थिक वर्षको माघ मसान्तसम्म १३ दशमलब १ प्रतिशतको ब्रोडब्याण्ड पहुँचमा वृद्धि हुन पुगेको छ ।

रिपोर्टमा गत वर्षको फागुन महिनामा ४५ दशमलब ६७ प्रतिशत ब्रोडब्याण्ड कनेक्सनको पहुँच थियो भने चालु आवको माघ मसान्तसम्म त्यसमा दोहोरो अंकको वृद्धि हुँदै ५८.७७ प्रतिशतको वृद्धि भएको उल्लेख छ ।

ब्रोडब्याण्ड पहुँचको तथ्यांक हेर्दा विगत एक वर्षमा निरन्तर वृद्धि भईरहेको देखिन्छ । चालु आवको माघ महिनामा पुस महिनाको तुलनामा मात्रै पनि २ प्रतिशत भन्दा बढिको वृद्धि भएको छ ।

ब्रोडब्याण्ड पहुँचको आधारमा हेर्दा सबैभन्दा धेरै पहुँच मोबाइल ब्रोडब्याण्डमार्फत भएको देखिन्छ । मोबाइल ब्रोडब्याण्ड सेवाले मात्र ७८ प्रतिशत बजार हिस्सा ओगटेको छ भने फिक्स वायर्ड तर्फ २० प्रतिशत बजार हिस्सा छ भने फिक्स्ड वायरलेसतर्फ केबल २ प्रतिशत बजार हिस्सा देखिन्छ ।

कम्पनीहरुको आधारमा हेर्दा ब्रोडब्याण्ड प्रयोगकर्ताहरु सबैभन्दा धेरै नेपाल टेलिकमको रहेको देखिन्छ, जसले सबैभन्दा धेरै थ्रीजी सेवा प्रयोग गर्ने गर्दछन् । त्यस्तै एनसेलका ग्राहकहरुमध्ये धेरैले थ्रीजी चलाउने गरेको देखिन्छ भने फोरजी सेवा दिईरहेका नेपाल टेलिकम, एनसेल र स्मार्ट टेलिकमको प्रयोगकर्ता निकै कम मात्र छन् ।

सबैभन्दा धेरै प्रयोगकर्ता भएको नेपाल टेलिकमका ६१ लाख ३३ हजार बढि ग्राहकहरुले थ्रीजी प्रयोग गर्दछन भने फोरजी मोबाइल ब्रोडब्याण्ड प्रयोगकर्ताको संख्या ७ लाख ११ हजार भन्दा बढि रहेको छ ।

त्यस्तै एनसेलका थ्रीजी प्रयोगकर्ताको संख्या ४५ लाख ७६ हजार भन्दा बढि रहेको देखिन्छ भने फोरजी प्रयोगकर्ताहरुको संख्या १६ लाख ७२ हजार भन्दा बढि छ ।

अर्को टेलिकम कम्पनी स्मार्ट टेलिकमले फोरजी सेवा मात्र प्रदान गरिरहेको छ, जो सँग १ लाख १९ हजार फोरजी मोबाइल ब्रोडब्याण्ड प्रयोगकर्ता रहेको देखिन्छ ।

एमआईएस रिपोर्टअनुसार थ्रीजी सेवा प्रयोगकर्ताहरुको कुल संख्या १ करोड ७ लाख १० हजार भन्दा बढि रहेको छ भने फोरजी सेवा प्रयोगकर्ताहरुको संख्या २५लाख ३ हजार भन्दा केहि बढि रहेको छ ।

माघ मसान्तमा मोबाइल ब्रोडब्याण्ड प्रयोगकर्ताहरु ४५.५८ प्रतिशत पुगेका छन भने फिक्स्ड ब्रोडब्याण्ड वायर्डको प्रयोगकर्ता ११.९६ प्रतिशत तथा फिक्स्ड वायरलेस प्रयोगकर्ता १.२३ प्रतिशत रहेको तथ्यांकमा उल्लेख छ।

TK Viber

प्रकाशित: १४ चैत्र २०७५, बिहीबार

Loading...