ह्वावेकी मेङद्वारा क्यानाडाको सीमा निकाय विरुद्ध मुद्दा दर्ता, अमेरिका विरुद्ध पनि मुद्धा गर्दै

काठमाडौं ।

टोरन्टो । चिनीया टेक कम्पनी ह्वावेकी प्रमुख वित्तीय अधिकृत मेङ वान्झाउले आफू विरुद्ध गैरकानुनी थुना, खानतलास र पुछताछ गरेको भन्दै क्यानाडा सरकार, यसको सीमा निकाय तथा राष्ट्रिय प्रहरी विरुद्ध मुद्दा दर्ता गरेकि छिन् ।

वान्झाउका वकीलहरुले ब्रिटिस कोलम्बिया सर्वोच्च अदालतमा आफ्नो मौलिक हक सुरक्षित गरिपाऊँ भन्दै मुद्दा दर्ता गरेका छन् । अमेरिकी सरकारको अनुरोधमा क्यानडाले मेङलाई गत वर्ष डिसेम्बर १ तारिखमा पक्राउ गरेको थियो ।

ह्वावेका संस्थापककी छोरी मेङमाथि अमेरिकाले इरानमाथि लगाएको प्रतिबन्धको उल्लङ्घन गरेको तथा इरानसँग व्यवसाय सञ्चालन गर्न बैंकहरुलाई गलत विवरण दिएको आरोप लागेको छ ।

पछिल्लो समय क्यानडा सरकारले मेङलाई अमेरिकी अधिकारी समक्ष सुपुर्दगी गर्न प्रक्रिया थालनी गरेको छ । मेङलाई हाल क्यानडा छाड्न नपाउने गरी जमानतमा रिहा गरिएको छ, र उनी क्यानडाको भ्यानकुभरमा बसिरहेकि छिन। चीनले मेङको गिरफ्तारीलाई राजनीतिक कारण भन्दै विरोध गरिरहेको छ ।

मेङको गिरफ्तारीका विषयमा चीन र क्यानडाबीच पनि तिक्तता छाएको छ । चीनले पनि राष्ट्रिय सुरक्षामा खतरा रहेको भन्दै क्यानडाका पूर्व कुटनीतिज्ञ माइकल कोभरिग र क्यानडाका व्यवसायी माइकल स्पाभोरलाई डिसेम्बर १० तारिखमा गिरफ्तार गरेको छ ।

गत शुक्रबार क्यानडाको न्याय विभागका अधिकारीहरुले सुपुर्दगी प्रक्रिया शुरु गर्न अनुमति दिएका थिए । सुपुर्दगी प्रक्रिया प्रारम्भ गर्न बुधबार मेङलाई अदालतमा उपस्थित गराइँदैछ । तर यो प्रक्रिया पूरा हुन महिनौं वा कहिलेकाहिँ वर्षौं लाग्न सक्छ ।

यसैबिच ह्वावेले अमेरिका विरुद्ध पनि मुद्धा दर्ता गर्ने तयारी गरेको छ । ह्वावेले अमेरिकाको टेक्सासमा यहि बिहिबार अमेरिकी सरकारविरुद्ध मुद्धा दायर गर्न लागेको रोयटर्सको रिपोर्ट आएको छ ।

ह्वावेले यूएस डिफेन्स अर्थोराईजेसन एक्टको विरुद्धमा चुनौती दिने बताईएको छ । चीनले सो ऐन आफू विरुद्ध प्रयोग गरिएको आरोप लगाउँदै आएको छ । अमेरिकाले सो ऐन अन्तरगत नै ह्वावेलाई अमेरिकी उपकरण तथा प्रविधि प्रतिबन्धित ईरानलाई बिक्री गरेको आरोप लगाएको थियो ।