२०१८ को चौथो क्वाटरमा पर्सनल कम्प्यूटरको माग घट्यो, लेनोभो पहिलो स्थानमा

काठमाडौं । सन् २०१८ को चौथो क्वाटरमा डेस्कटप, नोटबुक्स र वर्क स्टेशनको कुल ग्लोबल शिपमेन्टमा ३.७ प्रतिशतको कमी आएको छ । बजार अनुसन्धान फर्म आइडिसीकाअनुसार यो वर्ष गत वर्षको तुलनामा कम्प्यूटरको मागमा ३.७ प्रतिशतको कमी आएको हो ।

रिपोर्टकाअनुसार२०१८ को चौथो क्वाटरमा पर्सनल कम्प्यूटरको शिपमेन्ट ६.८१ करोड भएको छ ।विश्लेषकहरुकाअनुसार यो शिपमेन्टको कमी अनुमान गरेभन्दा कम हो । विश्लेषकहरुले ४.७ प्रतिशतले कमी आउने अनुमान गरेका थिए । तर सन् २०१६ को तेस्रो चौमासिकपछि यो हालसम्मको सबैभन्दा ठूलो गिरावट हो ।

रिपोर्टअनुसार सन् २०१९ को पहिलो दुई चौमासिकमा पनि उद्योगमा चुनौती पूर्ण हुने बताएको छ ।
अमेरिका र चीनको बीचमा बढिरहेको व्यापार द्धन्दले पनि यसलाई अझ प्रभावित पार्ने अनुमान छ ।

आइडिसीको रिपोर्टअनुसार शिपमेन्टको आधारमा हेर्दा सबैभन्दा पहिलो स्थानमा लेनोभो रहेको छ । लेनोभोले सो अवधिमा १.३ प्रतिशतको वृद्धि हासिल गर्दै कुल बजारको २४.६ प्रतिशत ओगटेको छ, जसले कुल १ करोड ६७ लाख भन्दा बढि यूनिट शिपमेन्ट गरेको छ ।

त्यस्तै सो अवधिमा एचपीले १ करोड ६० लाख यूनिट शिपमेन्ट गरेर दोस्रो स्थानमा छ । तर एचपीको वृद्धिदर भने ३.२ प्रतिशतले नकारात्मक देखिएको छ । एचपीले २३.६ प्रतिशत बजार शेयर लिएको छ ।

त्यसैगरि तेस्रो स्थानमा १६.५ प्रतिशतसहित डेल ब्राण्डले ओगटेको छ भने चौथो स्थानमा एप्पल कम्पनी रहेको छ । एप्पलले सो अवधिमा करिब ५० लाख यूनिट पर्सनल कम्प्यूटर, नोटबुक र वर्क स्टेशन शिपमेन्ट गर्दै ७.२ प्रतिशत बजार हिस्सा कायम गरेको छ ।

यो सूचीको पाँचौँ नम्बरमा एसर ग्रुप रहेको छ, जसको बजार हिस्सा ६.७ प्रतिशत रहेको छ भने अन्य कम्पनीको बजार हिस्सा २१.४ प्रतिशत रहेको छ ।