एप्पलको तीन नयाँ आइफोन सार्वजनिक, ड्यूल सिम प्रयोग गर्न मिल्ने, नयाँ एप्पल वाच पनि साथमा

काठमाडौं ।

काठमाडौं । अमेरिकी टेक कम्पनी एप्पलले तीन नयाँ आइफोन सार्वजनिक गरेको छ । कम्पनीले स्टीभ जब्स थिएटरमा विशेष इभेन्टको आयोजना गर्दै नयाँ आइफोन तथा अन्य उत्पादनहरु सार्वजनिक गरेको हो ।

कम्पनीले ल्याएको तीन नयाँ आइफोनहरुमध्ये एउटा बजेट आइफोनको रुपमा आएको छ । एप्पलले आइफोन एक्स एस (iPhone Xs), आइफोन एक्स एस म्याक्स (iPhone Xs Max)र आइफोन एक्स आर(iPhone Xr) नाममा तीन नयाँ आइफोन ल्याएको छ ।

आइफोन एक्स एस गत वर्ष सार्वजनिक भएको आइफोन एक्सको सक्सेसरको रुपमा आएको छ भने आइफोन एक्स एस म्याक्स र आइफोन एक्स आर नयाँ सिरिजमा आएका हुन् ।

आइफोन एक्स एसमा ५.१ इन्चको सूपर एमालेड डिस्प्ले छ भने आइफोन एक्स एस म्याक्समा ६.५ इन्चको सूपर एमालेड डिस्प्ले छ ।यी दुबै एचडीआर डिस्प्ले आइफोन हुन् । यसमा डल्बी डिजिटल साउण्ड, प्रोक्सिमिटि लाइट, एम्बियन्ट लाइट र फेस आइडी राखिएको छ ।
दुबै आइफोनमा ए १२ बायोनिक प्रोसेसर राखिएको छ । यी फोनहरु ५१२ जीबी स्टोरेज राखिएको छ ।

फोटोका लागि १२ मेगा पिक्सेलको ड्यूल रियर क्यामरा तथा ७ मेगापिक्सेलको फ्रन्ट क्यामरा राखिएको छ ।

त्यसैगरि यी फोनहरुमा ड्यूल सिम सपोर्टका लागि ई सिम टेक्नोलोजी प्रयोग गरिएको छ । चीनका लागि भने ड्यूल सिम नै प्रयोग गर्न सकिने गरि राखिने एप्पलले जानकारी दियो ।

अर्को आइफोन भने विभिन्न कलर अप्सनमा उपलब्ध हुनेछ जसमा ६.१ इन्च एलसिडी डिस्प्ले राखिएको छ । कम्पनीले धेरै भन्दा धेरै उपभोक्तासम्म पुग्नको लागि नयाँ आइफोन ल्याएको बताएको छ । जसमा होम बटन राखिएको छैन् । यो स्मार्टफोनलाई कम्पनीले आइफोन एक्स आर नाम दिएको छ ।

जसमा एउटा मात्र रियर क्यामरा राखिएको छ । यसको क्यामरा १२ मेगापिक्सेलको रहेको छ । त्यस्तै सेल्फीका लागि पनि सात मेगापिक्सेलको फ्रन्ट क्यामरा राखिएको छ । यसमा आईपी ६७ प्रोटेक्ट रहेको छ जसले धुलो र पानीबाट फोनलाई बचाउनेछ ।

यो फोन ७४९ अमेरिकी डलरदेखि शुरु हुनेछ भने यो ६४ जीबी, १२८ जीबी र २५६ जीबीसम्म उपलब्ध हुनेछ । यो फोन अक्टोबरमा मात्र उपलब्ध हुनेछ ।

त्यस्तै आइफोन एक्स एस ९९९ अमेरिकी डलर देखि र आइफोन एक्स एस म्याक्स १०९९ अमेरिकी डलरदेखि शुरु हुनेछ । यी फोनहरु सेप्टेम्बरमा नै आउनेछन् ।

यसका साथमा कम्पनीले एप्पल वाच सिरिज फोर पनि सार्वजनिक गरेको छ ।