एप्पलको आईफोन सेभेन तथा सेभेन प्लस सार्वजनिक, नयाँ एप्पल वाच पनि घोषणा

काठमाडौं ।

काठमाडौं, २३ भदौ । एप्पलले बहुप्रतिक्षित आईफोन सेभेन सिरिजका फोनहरु सार्वजनिक गरेको छ । कम्पनीले बुधवार एक कार्यक्रमका बिच अमेरिकाको सानफ्रान्सिस्कोमा आईफोन सेभेन तथा आईफोन सेभेन प्लस सार्वजनिक गरेको हो ।

कम्पनीले आईफोन सेभेन सिरिजमा केहि नयाँ फीचरहरु राखेको छ । यसमा एलुमिनियम बडि छ भने यसलाई अहिलेसम्मकै उत्कृष्ट आईफोन भनिएको छ । यसमा १० नयाँ विशेषताहरु रहेका छन् । यो ब्ल्याक, सिल्भर, जेट ब्ल्याक, गोल्ड र रोज गोल्ड कलरमा आउनेछ ।

यसमा २.४ गीगाहर्जको ६४ बिटको फोर कोर ए१० फ्यूजन प्रोसेसर प्रयोग गरिएको छ, जून ए ९ भन्दा ५० प्रतिशत द्रूत छ । त्यस्तै यसको होम बटनमा पनि सुधार गरिएको छ भने नयाँ आईफोनको अर्को महत्वपूर्ण विशेषता भनेको डस्ट एण्ड वाटरप्रुफ हो, जुन एप्पल वाचले यसअघि नै प्राप्त गरिसकेको छ ।

आईफोन सेभेन प्लसको क्यामरा सेटअपमा दुईवटा १२ मेगापिक्सेलको सेन्सरहरु राखिएका छन् । एउटा सेन्सरमा सिक्स एलीमेन्ट वाइड एंगल लेन्स छ भने अर्कोमा फाइभ एलीमेन्ट वाइड एंगल लेन्स रहेको छ । तर आईफोन सेभेनमा भने १२ मेगापिक्सेलको एउटा क्यामरा सेटअप मात्र छ । क्वाड एलईडी फ्ल्याश दुबै आईफोन मोडलमा राखिएको छ । यसमा भिडियो इमेज स्टेबलाइजेशन पनि रहेको छ । आईफोन सेभेनमा सेल्फीका लागि ७ मेगापिक्सेलको एचडी फ्रन्ट क्यामरा राखिएको छ ।

कम्पनीले आईफोन सेभेन सिरिजमा केहि नयाँ फीचरहरु राखेको छ । यो सिरिजको नयाँ आईफोनमा अडियो ज्याक हटाईएको छ, नयाँ आईफोन सेभेन सिरिजमा अडियो ज्याकको साटो ब्लूटूथ हेडसेट प्रयोग हुन्छ र पुरानो हेडफोन प्रयोग गर्नका लागि एडप्टर राखिएको छ । एप्पलको आईफोनमा हेडफोन ज्याक हटाईएको छ तर वायरलेस एयरपोड्स तथा लाइटिंग ३.५ एमएमको एडप्टरसँगै आउनेछ ।

नयाँ आईफोनमा ३ फरक फरक स्टोरेज अप्सन राखिएको छ । आईफोन सेभेनमा ३२ जीबी आधार मोडल छ भने १२८ जीबी र २५६ जीबी स्टोरेज मोडल पनि रहेका छन् ।

यसमा रेटिना एचडी डिस्प्ले राखिएको छ, जसले कलर म्यानेज गर्न सक्दछ, त्यसैगरी स्पिकरमा सुधार गर्र्द स्टेरियो स्पीकर राखिएको छ । आईफोन सेभेनमा ४.७ इन्च तथा आईफोन प्लसमा ५.५ इन्चको डिस्प्ले राखिएका छन् । आईफोन सेभेनको मूल्य ६४९ अमेरिकी डलर तथा सेभेन प्लसको ७६९ डलर तोकिएको छ । यो अमेरिका, बेलायत र चीनमा उपलब्ध हुनेछ ।

प्रि अर्डर सेप्टेम्बर ९ तारिखदेखि गर्न सकिनेछ भने एक सातापछि मात्र किन्न सकिनेछ ।

एप्पल वाच सिरिज टू

कम्पनीले नयाँ आईफोनका साथमा नयाँ एप्पल वाच पनि सार्वजनिक गरेको छ । एप्पल वाच सिरिज टू नाम दिईएको नयाँ वाचमा कयौं नयाँ फीचरहरु राखिएका छन् । यसमा आकस्मिक फोनकलका लागि सुविधा, फिटनेस एप, पहिलो पटक पोकिमन गो नयाँ एप्पल वाचमा उपलब्ध हुनेछ । त्यसैगरी यो वाटरप्रुफ, यसको स्पीकरलाई नै वाटरप्रुफ बनाईएको छ । पोकिमन गोसहितको एप्पलको नयाँ वाच सन् २०१६ को अन्त्यमा उपलब्ध हुनेछ ।

यसमा ड्यूल कोर प्रोसेसर छ भने सुधार गरिएको डिस्प्ले राखिएको छ जून घाममा हेर्दा पनि समस्या आउँदैन् । त्यस्तै यसमा बिल्ट इन जीपीएस पनि राखिएको छ । यसमा मेटल, स्टिल र सेरामिक प्रयोग गरिएको छ । यो वाच आईओएस ३ द्धारा संचालन हुन्छ । एप्पलले नाइकीसँगको सहकार्यमा एथलेटहरुका लागि नाइकी प्लस स्पेशल एडिसन पनि सार्वजनिक गरेको छ । एप्पल वाचको मूल्य ३६९ अमेरिकी डलरदेखि शुरु हुनेछ ।

प्रि अर्डर सेप्टेम्बर ९ तारिखदेखि गर्न सकिनेछ भने सेप्टेम्बर १३ देखि बजारमा उपलब्ध हुनेछ ।