Technology Khabar २४ असार २०७३, शुक्रबार
काठमाडौं ।
काठमाडौं, २४ असार । पेय पदार्थ उत्पादन गर्ने कम्पनी पेप्सीको पहिलो स्मार्टफोन अनलाईनमा खरिदका लागी उपलब्ध भएको छ । विगत निकै समयअघिदेखि पेप्सीले स्मार्टफोन उत्पादनको क्षेत्रमा लगानी गरेको भन्दै चर्चा भएको थियो । त्यसबेला नै पेप्सीले पी वान एस (Pepsi P1S) स्मार्टफोन ल्याउन लागेको बताईएको थियो ।
पेप्सीले पहिलो पटक उत्पादन गरेको पेप्सी पी वान एस स्मार्टफोन हालै बेलायतकाे लण्डनमा भएको अनलाइन स्टोर ब्यांगगुडडटकम (www.banggood.com) मा लिस्टेड भएको छ । यो स्मार्टफोन बजेट फोनको रुपमा आएको छ जुन निकै सस्तो मूल्यमा लिस्टेड भएको छ ।
पेप्सी पी वान एस स्मार्टफोनको मूल्य ७०८ यूआन अर्थात १०६ अमेरिकी डलर बराबर तोकिएको छ । तर अनलाइन स्टोरले यसको मूल्य विशेष प्रबद्र्धनात्मक बिक्रीका लागि ६६८ यूआन अर्थात करिब १ सय अमेरिकी डलर तोकेको छ । विशेष मूल्यमा यो स्मार्टफोन यहि जूलाई ७ देखि १६ तारिखसम्म किन्न सकिनेछ । यो मूल्यमा करिब एक सयवटा यूनिट मात्र बिक्री गरिनेछ ।
पेप्सी पी वान एस
पेप्सीको यो स्मार्टफोनमा ५.५ इन्चको २.५ डी कब्र्ड ग्लास भएको फूलएचडी डिस्प्ले राखिएको छ । यसमा १.७ गीगाहर्जको मिडिया टेकको एमटि ६५९२ अक्टा कोर प्रोसेसर राखिएको छ । यो फोनमा २ जीबीको र्याम तथा १६ जीबीको आन्तरिक स्टोरेज रहेको छ, जसलाई ६४जीबीसम्म बढाउन सकिन्छ ।
पेप्सी पी वान एस स्मार्टफोन पछाडिको भागमा फिंगरप्रिन्ट सेन्सरसहित उपलब्ध छ । यसमा एलईडी फ्ल्याशसहितको १३ मेगापिक्सेलको रियर क्यामरा छ भने ५ मेगापिक्सेलको फ्रन्ट क्यामरा राखिएको छ ।
फोरजी एलटिई सपोर्ट गर्ने यो फोनमा कनेक्टिभिटीका लागि वाईफाई, थ्रीजी, ब्लूटूथ, यूएसबी ओटिजी, जीपीएसलगायतका फीचर छन् ।
यो स्मार्टफोनमा ३,००० एमएएचको नन रिमूभेवल ब्याट्री राखिएको छ भने यसको मोटाई ७.७ मिलिमिटर तथा तौल १५८ ग्राम रहेको छ ।
प्रकाशित: २४ असार २०७३, शुक्रबार