एक्सक्लूसिभःसामसुंग ग्यालेक्सी एस सेभेनबाट अर्को फोन चार्ज हुने, डकुमेन्ट पनि हेर्न सकिने (भिडियोसहित)

काठमाडौं ।

काठमाडौं, २४ वैशाख । सामसुंगले सार्वजनिक गरेको ग्यालेक्सी एस सेभेन (Galaxy S7) तथा एस सेभेन एजको (S7 Edge) चर्चा चलिरहेको छ । यसको विशेषता तथा यसमा भएका विभिन्न प्रविधिहरुको बारेमा समाचारहरु पनि आईरहेका छन् ।

सामसुंगले सार्वजनिक गरेको ग्यालेक्सी एस सेभेन तथा एस सेभेन एजको एउटा विशेषताको बारेमा भने कम्पनीले अहिलेसम्म औपचारिकरुपमा घोषणा गरेको छैन् । कम्पनीले भन्न नचाहेको यो विशेषता भनेको यो स्मार्टफोनलाई ‘पावर बैंक’को रुपमा प्रयोग गर्न सकिने फीचर हो ।

पछिल्ला दिनहरुमा अधिक शक्तिशाली ब्याट्रीसहितका उच्च क्षमता भएका स्मार्टफोनहरु सार्वजनिक हुँदै आएका छन् । यी स्मार्टफोनहरुको उद्धेश्य सकेसम्म ब्याट्री क्षमता अधिक बनाउनु र छिटो छिटो चार्ज गर्ने झन्झटबाट प्रयोगकर्तालाई मुक्त गर्नु हो ।

त्यसैगरी कतिपय स्मार्टफोन तथा अन्य फोनहरु पावर ब्यांकको रुपमा प्रयोग गर्ने गरि नै उत्पादन गरिएका हुन्छन र ती फोनहरुलाई कम्पनीले पावर ब्यांक वा अर्को फोन चार्ज गर्ने चार्जरको रुपमा बिक्री गरिरहेका छन् ।

शक्तिशाली ब्याट्री भएका र पावर ब्यांकको रुपमा आएका फोनहरु बाहेक प्रिमियम सेटहरुमा सामान्यतः पावर ब्यांकको रुपमा प्रयोग गर्ने फीचर राखिएको हुँदैन् । तर सामसुंगको ग्यालेक्सी एस सेभेन (Galaxy S7) स्मार्टफोनलाई भने हामीले पावर ब्यांकको रुपमा पनि प्रयोग गर्न सक्दछौं । यो फोनलाई अर्को फोनमा ब्याट्री सकिएको वा ब्याट्री कम भएको बेला चार्ज गर्ने ब्याट्री ब्याकअपको रुपमा प्रयोग गर्न सकिन्छ ।

सामसुंग ग्यालेक्सी एस सेभेनलाई पावर ब्यांकको रुपमा प्रयोग गर्न सकिने सुविधा छ । कम्पनीले अहिलेसम्म ल्याएको उच्च तहको प्रिमियम सेट भएको हुँदा यो फीचरको बारेमा जानकारी नदिएको पनि हुनसक्दछ ।

त्यसैगरी सामसुंग ग्यालेक्सी एसमा ओटिजी डिभाइसको प्रयोग गरेर सिधै कुनै पनि पेन ड्राईभ जस्ता स्टोरेज डिभाइसबाट विभिन्न तस्विर, भिडियो, टेक्स्टलगायतका डकुमेन्टहरु हेर्न वा कपि गर्न सकिन्छ ।

कसरी पावर ब्यांकको रुपमा प्रयोग गर्ने ?

तर हामीले यसको यो फीचरलाई सहजरुपमा नै प्रयोग गरेर अर्को कुनै डिभाइस चार्ज गर्न सक्दछौं । यसको लागि तपाईँले खरिद गरेको सामसुंग ग्यालेक्सी एस सेभेन स्मार्टफोन, एउटा ओटिजी (OTG) डिभाइस तथा डाटा केबल आवश्यक पर्दछ ।

सामसुंग ग्यालेक्सी एस सेभेन खरिदको समयमा आउने बक्समा नै यी सबै सामाग्रीहरु राखिएका हुन्छन् । ओटिजी डिभाइस हरेक एस सेभेनको खरिदमा कम्पनीले दिईसहेको छ भने तपाईँले एस सेभेनका लागि प्राप्त गर्नुभएको डाटा केबललाई नै यहाँ प्रयोग गर्न सकिन्छ ।

ग्यालेक्सी एस सेभेनबाट अर्को कुनै डिभाइस जस्तै स्मार्टफोन, फीचर फोन वा स्मार्टवाच रिचार्ज गर्न सकिन्छ । यसको लागि सबैभन्दा पहिले सामसुंग ग्यालेक्सी एस सेभेनको मुनीको भागमा रहेको फोन चार्ज गर्ने स्थानमा ओटिजी डिभाइस जोड्नुपर्ने हुन्छ । उक्त डिभाइस जोड्ने बित्तिकै तपाईँको एस सेभेनमा त्यसको नोटिफिकेशन देखिन्छ, वा फोन स्लिपमा छ भने डिस्प्ले अन हुन्छ ।

त्यसपछि तपाईँले त्यो ओटिजी डिभाइसको तल्लो पट्टिको भागमा डाटा केबलको यूएसबी पोर्ट तर्फको भाग जोड्नुपर्ने हुन्छ । यो डाटा केबलको फोन चार्ज गर्ने अर्को पट्टिको भागलाई जुन फोन चार्ज गर्नुपर्ने हो त्यो फोनको चार्ज गर्ने भागमा जोड्नु पर्ने हुन्छ ।

यो सबै प्रकृया पुरा गरेपछि तपाईँको ब्याट्री चार्ज सकिएको फोनमा चार्ज भएको सिग्नल देखिन्छ र फोनलाई आवश्यकता अनुसार मज्जाले चार्ज गरेर प्रयोग गर्नुस् । यसका साथै तपाईँले एस सेभेनको सहयोगबाट अर्को फोनमा भएका विभिन्न डकुमेन्टहरु पनि आदान प्रदान गर्न सक्नुहुनेछ ।

हेर्नुहोस् भिडियो-

कसरी पेन ड्राईभको डकुमेन्ट ग्यालेक्सी एस सेभेनमा हेर्ने ?

तपाईँको पेन ड्राइभजस्ता पोर्टेबल स्टोरेज डिभाइसमा आफ्ना विभिन्न डकुमेन्ट ल्यापटप, डेस्कटप नभएको बेलामा पनि डकुमेन्ट हेर्न वा जाँच गर्न सकिन्छ । यो सुविधा सामसुंगको प्रिमियम हेडसेट ग्यालेक्सी एस सेभेनमा पनि राखिएको छ । यसको लागि फोनसँगै आउने ओटिजी डिभाइस आवश्यक पर्दछ ।

पेन ड्राइभजस्ता पोर्टेबल स्टोरेज डिभाइसका डकुमेन्ट ल्यापटप, डेस्कटप नभएको बेलामा ग्यालेक्सी एस सेभेनबाट हेर्न सकिन्छ ।

ग्यालेक्सी एस सेभेनको मुनी फोन चार्ज गर्ने भागमा ओटिजीको एकतिरको भाग जोड्नुहोस् । ओटिजी जोडिसकेपछि फोनमा ओटिजी जोडिएको संकेत आउनेछ वा फोनको डिस्प्ले अन हुनेछ ।

त्यसपछि ओटिजीको अर्कोतिरको भागमा आफ्नो डकुमेन्ट भएको पेन ड्राइभ वा पोर्टेबल स्टोरेज डिभाइस जोड्नुहोस् ।

पेन ड्राइभ जोडेपछि एस सेभेनको डिस्प्लेमा सिधै पेन ड्राइभमा भएका विभिन्न डकुमेन्टहरु हेर्न वा प्रयोग गर्न सकिन्छ । यी डकुमेन्टहरु फोनमा कपि गर्न पनि सकिन्छ ।

यो फीचरले गर्दा पेन ड्राइभमा भएका विभिन्न डकुमेन्टहरु हेर्नको लागि अन्य ल्यापटप, डेक्सटपलगायतका वस्तुहरु चाहिँदैन र हिँड्दा हिँड्दै पनि आफ्ना डकुमेन्टहरु हेर्न सकिन्छ ।

अब तपाईँ पनि ग्यालेक्सी एस सेभेनको यो नयाँ फीचर एक पटक प्रयोग गर्ने हो की ?

नयाँ फीचरको जानकारी कस्तो लाग्यो हामीलाई कमेन्ट बक्समा प्रतिकृया दिनुहोस् ।