Technology Khabar २६ भाद्र २०७२, शनिबार
काठमाडौं ।
काठमाडौं । ललितपुरको लगनखेलस्थित कर्मचारी संचय कोष भवनमा रहेको ललितपुर मल तथा ललितपुर मोबाइल कम्प्लेक्स औपचारिकरुमा संचालनमा आएको छ । त्यसैगरी मोबाइल कम्प्लेक्सले अन्तर्राष्ट्रियस्तरको नेपालको सबैभन्दा ठूलो मल्टिब्राण्ड मोबाइल शोरुम पनि शुक्रबारदेखि संचालनमा ल्याएको छ ।
अर्थमन्त्री डा.रामशरण महतले ललितपुर मोबाइल कम्प्लेक्स तथा मोबाइल एक्स्पो २०७२ उदघाटन गर्दै हरेक प्रकारका सामाग्रीहरु एकै स्थानमा खरिद गर्न सकिने गरि मलहरु खोलिनु आवश्यक भएको बताए । उनले समाज आधुनिकिकरणतर्फ उन्मुख भएको भन्दै यस्ता सपिंग मलहरुले आर्थिक गतिविधि बढाउन सहयोग गर्ने स्पष्ट पारे । उक्त कार्यक्रममा अर्थमन्त्री डा. महतले अहिले तराईका जिल्लाहरु बन्द गर्ने तथा भन्सार नाकाहरुलाई ठप्प पारेर काठमाडौंलाई बन्दि बनाउन खोजेको आरोप लगाएका थिए ।
उदघाट्न कार्यक्रममा ललितपुर मोबाइल कम्प्लेक्सका अध्यक्ष पुरुषोत्तम बस्नेतले ललितपुरमा पहिलो पटक व्यवस्थितरुपमा सपिंग मलको स्थापना भएको भन्दै यो छोटो अवधिमा नै स्थापित हुने विश्वास व्यक्त गरे । कम्प्लेक्सका अध्यक्ष बस्नेतले कम्प्लेक्सको शुभारम्भसँगै मोबाइल एक्स्पोको आयोजना गरिएको जानकारी दिँदै एक्स्पो अवधिभर मल्टिब्राण्ड शोरुमबाट ४० भन्दा बढि ब्राण्डका मोबाइलहरुमा विशेष छुट दिईने बताए ।
कार्यक्रममा ललितपुर मलका अध्यक्ष नेपाल डंगोलले आर्थिक गतिबिधि बढाउन यो मलले सहयोग गर्ने अपेक्षा गर्दै मल हरेक पुस्ताका ग्राहकहरुको लागि उपयुक्त रहेको दाबी गरे । उनले ललितपुर जिल्लामा नै पहिलो पटक व्यवस्थितरुमा मल संचालन गरिएको भन्दै ग्राहकहरुले सूपथ मूल्यमा अधिकतम सेवा सुविधा प्राप्त गर्ने बताए ।
एक्स्पोको पहिलो दिन नै २० हजारभन्दा बढि अवलोकनकर्ताहरुले अवलोकन गरेको आयोजकले जानकारी दिएको छ ।
ललितपुर मोबाइल कम्प्लेक्सले संचालन गरेको मल्टिब्राण्ड मोबाइल शोरुममा ४० भन्दा बढि मोबाइल ब्राण्डहरु, मोबाइल पसलहरु तथा आधिकारीक सर्भिस सेन्टर संचालनमा आउने छन् । त्यस्तै नेपालमा सबैभन्दा ठूलो मोबाइल शोरुम स्थापना हुनेछ, जहाँ एकै पटक ४ हजारदेखि ५ हजार ग्राहकले सुविधा प्राप्त गर्न सक्नेछन् । नेपालमा नै पहिलो पटक नौलो अवधारणामा मल्टिब्राण्ड मोबाइल शोरुम संचालन गरिएको यो कम्स्प्लेक्समा सिल प्याक गरिएका मोबाइल फोन मात्र बिक्री गरिने दाबी गरिएको छ ।
त्यसैगरी भदौ २५ देखि ३ गतेसम्म ललितपुर मोबाइल कम्प्लेक्समा मोबाइल एक्सपो २०७२ आयोजना हुनेछ । कम्प्लेक्सको शुभारम्भको अवसरमा मेला अवधिभर हरेक मोबाइलको खरिदमा ७ प्रतिशतदेखि ७० प्रतिशतसम्मको छुट ग्राहकहरुले प्राप्त गर्नेछन् । मोबाइल कम्प्लेक्समा न्यूनतम ९ सयदेखि १ लाख रुपैंयासम्मको ब्राण्डेड मोबाइल फोनहरु उपलब्ध हुनेछन् । एक्स्पोको अवसरमा हरेक दिन लक्कि ड्रमार्फत पाँच वटा स्मार्टफोन उपहार प्रदान गरिने बताईएको छ ।
मोबाइल एक्स्पोको अवसर पारेर मोबाइल कम्प्लेक्समा नेपालमै पहिलो पटक नौलो किसिमले मोबाइल एक्सचेन्ज गर्ने सुविधा राखिएको छ । उक्त मोबाइल एक्स्पोमा मोबाइल एक्सचेन्जका लागि मोबाइल भ्यालुएटर राखिनेछ । मोबाइल सम्बन्धि दक्ष र अनुभवि मोबाइल भ्यालुएटरले पुरानो मोबाइलको अधिकतम मूल्य तोकेर एक्सचेन्ज गराउने व्यवस्था मिलाईएको जानकारी दिईयो ।
मोबाइल एक्स्पोमा सामसुंग, हुवावे, जियोनी, आईफोन, एचटिसी, माइक्रोसफ्ट फोनहरु, डिटिसी, लाभा, विनकम, फ्लाई, कलर्स, इन्टेक्स, माइक्रोम्याक्स, सोनी, एलजी, ब्ल्याकबेरी, कार्बन, पानासोनिक, केनजिन्दालगायत ब्राण्डका फोनहरु उपलब्ध गराईनेछ ।
एक्स्पोमा करिब १० लाख भन्दा बढिले अवलोकन गर्ने अनुमान गरिएको छ । एक्स्पोको अन्तिम दिन मोबाइल खरिदकर्ता ग्राहकहरुमध्येबाट १ जनालाई लक्कि ड्रको माध्यमबाट बम्पर उपहार प्रदान गरिनेछ । त्यसैगरी भूकम्प पिडितलाई स्मार्टफोनको खरिदमा ८ जीबीको मेमोरीकार्ड निशुल्क दिईने छ । मोबाइल एक्स्पोमा प्रवेशका लागि टिकट दर रु १०० तथा विद्यार्थीका लागि रु ५० तोकिएको मोबाइल कम्प्लेक्सले जनाएको छ ।
प्रकाशित: २६ भाद्र २०७२, शनिबार
