शिओमीको कर्ब्ड स्मार्टफोन आउँदै, ग्यालेक्सी एस सिक्स एज जस्तै दुबैतिर कर्ब्ड स्क्रीन

काठमाडौं ।

काठमाडौं, १४ भदौ । चीनियाँ स्मार्टफोन मेकर कम्पनी शिओमीले छिटै कर्ब्ड स्क्रीनसहितको स्मार्टफोन सार्वजनिक गर्न लागेको छ । चीनियाँ कम्पनीको नयाँ स्मार्टफोनको बारेमा लीक भएको समाचारअनुसार कम्पनीले मिडरेन्जको स्मार्टफोन एमआई फोर आईको राम्रो बजार प्रतिकृयापछि नयाँ फ्ल्यागशिपमा काम गरिरहेको छ ।

सार्वजनिक भएका समाचारअनुसार कम्पनीको यो स्मार्टफोनमा सामसुंगको ग्यालेक्सी एस सिक्स एजको जस्तै दुबैतिर कर्ब्ड स्क्रीन प्रयोग हुनेछ । कम्पनीले कर्ब्ड स्क्रीनसहितको स्मार्टफोनको नाम शिओमी एमआई एज वा एमआई आर्क (Mi Edge/Mi arch) हुनसक्ने बताईएको छ ।

रिपोर्टका अनुसार यो स्मार्टफोन सामसुंगको एस सिक्स एज (S6 Edge) को डिजाइन जस्तै हुनेछ । यो स्मार्टफोनमा ५.२ इन्चको कर्ब्ड स्क्रीन हुनेछ, जसको क्षमता टूके (2K) रिजोल्यूशन हुनेछ । यसको डिस्प्ले जापानी कम्पनी शार्पले बनाएको हो ।

लीक भएको जानकारी अनुसार शिओमीको नयाँ स्मार्टफोनमा स्न्यापड्यागन ८०८ हेक्साकोर चीपसेट तथा एड्रीनो ४१८ जीपीयू राखिनेछ । यो फोनमा ३ जीबी वा ४ जीबीको र्याम हुनसक्नेछ । यसका साथै यो स्मार्टफोनमा फिंगरप्रीन्ट सेन्सर फीचर पनि हुनेछ ।

शिओमीको कर्ब्ड फोनमा १६ मेगापिक्सेलको रियर क्यामरा हुनसक्ने बताईएको छ ।

लीक भएको जानकारीअनुसार कम्पनीले यो स्मार्टफोन अक्टुबरमा लन्च गर्न सक्नेछ भने यसको मूल्य २५०० यूआन अर्थात करिब ४२५०० रुपैंया हुनेछ ।